Hlutabréfaverð Icelandair féll um 2% í fyrstu viðskiptum í Kauphöllinni í dag og stóð í 0,99 krónum á hlut þegar fréttin var skrifuð. Hlutabréfaverð flugfélagsins er nú búið að lækka um meira en 26% í ár og hefur ekki lægra síðan í nóvember 2020.
Gengi hlutabréfa flugfélagsins er þar með komið undir 1,0 krónu útboðsgengið í hlutafjárútboði Icelandair í september 2020 þar sem flugfélagið samþykkti boð upp á 30 milljarða króna. Líkt og þekkt er var mikil þátttaka meðal almennings í umræddu útboði og margfaldaðist fjöldi hluthafa Icelandair að því loknu.
Icelandair birti uppgjör fyrsta ársfjórðungs fyrir rúmri viku. Flugfélagið tapaði yfir 8 milljörðum króna eftir skatta en greindi á sama tíma fyrir því að heildartekjur á fyrsta ársfjórðungi hafa aldrei verið meiri í sögu félagsins.
Tilkynnt var í gær að samninganefndir Félags flugmálastarfsmanna ríkisins (FFR) og Sameykis stéttarfélags í almannaþjónustu hefðu ákveðið að boða til yfirvinnu- og þjálfunarbanns ásamt tímabundnum og tímasettum aðgerðum við öryggisleit og farþegaflutninga fjóra morgna í maí.
Hlutabréfaverð Play hefur einnig lækkað um 1,9% í morgun og stendur gengi félagsins í 4,22 krónum á hlut þegar fréttin er skrifuð. Gengi hlutabréfa Play er nú 6,2% undir áskriftarverðinu í nýafstaðinni 4,6 milljarða króna hlutafjáraukningu félagsins.
