Hlutabréfaverð Íslandsbanka lækkaði um rúm 3% í viðskiptum dagsins og var dagslokagengið sléttar 100 krónur. Íslandsbanki mun birta árshlutauppgjör fyrsta ársfjórðungs eftir lokun markaða í kvöld.
Dagslokagengi bankans náði hápunkti á árinu í 116,4 krónum í byrjun janúar en hefur síðan þá lækkað um 14%.
Hlutabréf í fjárfestingafélaginu Skel lækkuðu einnig um 3% í viðskiptum dagsins. Gengi Skaga fór einnig niður um 3% í dag og var dagslokagengi samstæðunnar 16,2 krónur.
Gengi Kviku banka lækkaði um 2% í yfir 350 milljón króna veltu en bankinn birti árshlutauppgjör eftir lokun markaða í dag. Daglokagengi bankans var 13,75 krónur en bankinn hagnaðist um rúman milljarð á fyrsta ársfjórðungi.
Ármann Þorvaldsson forstjóri Kviku greindi einnig frá því að vinna á endanlegrar áreiðanleikakönnunar og undirritun kaupsamnings við Landsbankann vegna sölu TM væri á ágætri leið.
Mesta veltan var með bréf Arion Banka en gengi bankans lækkaði um 1% í 805 milljón króna viðskiptum. Heildarvelta á markaði nam 2,5 milljörðum króna og var því um 32% af allri veltu með bréf Arion banka.
Úrvalsvísitalan OMXI 15 lækkaði um 1,23% í viðskiptum dagsins.
