Gengi krónunnar hefur haldist tiltölulega stöðugt það sem af er ári eftir snarpa lækkun sem gekk þó til baka í haust vegna jarðhræringa á Reykjanesskaga.
Samkvæmt Peningamálum Seðlabanka Íslands er gengi krónunnar á árinu þó 0,8% lægra gagnvart meðaltali gjaldmiðla helstu viðskiptalanda en við útgáfu Peningamála í febrúar.
Seðlabankinn bendir á að framvirk gjaldeyrissala hefur aukist á árinu „sem kann að endurspegla væntingar um hækkun á gengi krónunnar.“
„Fjármagnsinnflæði vegna nýfjárfestingar hefur einnig aukist og gjaldeyriskaup lífeyrissjóða hafa minnkað frá upphafi ársins. Á móti hefur hreint innflæði vegna greiðslukortanotkunar minnkað í vetur,” segir í Peningamálum.
Seðlabankinn beitti inngripum á gjaldeyrismarkaði síðastliðinn febrúar þegar hann keypti gjaldeyri fyrir um 9,2 milljarða króna, til að bregðast við miklu erlendu innflæði inn á skuldabréfamarkaðinn.
Mun það hafa verið í fyrsta skipti síðan í maí 2022 sem Seðlabankinn kaupir gjaldeyri.
„Velta á gjaldeyrismarkaði hefur heldur minnkað á síðustu tveimur árum sem gæti bent til þess að markaðsaðilar þurfi í minna mæli að leita inn á gjaldeyrismarkaðinn enda hefur verið ágætt jafnvægi á utanríkisviðskiptum og inn- og útflæði gjaldeyris undanfarið.“
Gengisvísitala krónunnar var rúmlega 195 stig á fyrsta fjórðungi ársins sem er svipað og gert var ráð fyrir í Peningamálum í febrúar.
„Það sem af er öðrum fjórðungi hefur viðskiptavegið gengi krónunnar lækkað lítillega sem er einnig í takt við það sem spáð var í febrúar. Samkvæmt grunnspánni helst gengi krónunnar tiltölulega stöðugt út spátímann og verður svipað og gert var ráð fyrir í febrúarspá bankans,“ segir að lokum í umfjöllun Peningamála um krónuna.