Björgólfur Thor Björgólfsson hefur aftur komist á lista Forbes yfir ríkustu menn heims, en hann hefur ekki verið á listanum síðastliðin fimm ár.
Þetta kemur fram á vefsíðu tímaritsins , og vermir hann að þessu sinni 1415. sæti listans. Björgólfur deilir sætinu með nokkrum öðrum.
Auður Björgólfs er metinn á 1,3 milljarða bandaríkjadala samkvæmt listanum, en fjárhæðin jafngildir um 173,5 milljörðum íslenskra króna.
Helsta eign Björgólfs er í Actavis, sem áður hét Watson og yfirtók rekstur íslenska lyfjafyrirtækisins Actavis.
Björgólfur var síðast á listanum árið 2009 og var hann þá í 701. sæti listans.
Lauk skuldauppgjöri í ágúst í fyrra
Björgólfur Thor sendi frá sér tilkynningu í ágúst í fyrra sem Viðskiptablaðið fjallaði um . Þar sagði að heildaruppgjöri Björgólfs Thors Björgólfssonar og fjárfestingarfélags hans, Novators, við innlenda og erlenda lánardrottna væri lokið.
Heildarfjárhæð greidd til lánardrottna var um 1.200 milljarðar króna. Allar greiðslur voru í erlendri mynt og voru engar skuldir gefnar eftir.
