Japanska jenið veiktist gagnvart Bandaríkjadal, sem aftur styrkti Nikkei vísitöluna, þvert á almenna lækkun hlutabréfa á asíumörkuðum. Veikara jen hjálpar japönskum útflutningi.
Ræða seðlabankastjóra Bandaríkjanna hefur áhrif
Gerðist þetta í kjölfar ræðu bandaríska seðlabankastjórans Janet Yellen þar sem fram kom að rök fyrir stýrivaxtahækkun yrðu sífellt sterkari.
Í kjölfar ræðu Yellen lækkuðu hlutabréf almennt í virði á mörkuðum í Bandaríkjunum, og var lækkunin yfir vikuna sú mesta síðan kosið var um úrsögn Bretlands úr Evrópusambandinu í júní.
Bandaríkjadalur styrktist gegn helstu gjaldmiðlum asíu, og hlutabréf í Asíu lækkuðu vegna væntinga um að hærri vextir í Bandaríkjunum myndu draga fé fjárfesta inn á Bandaríkjamarkað.
Þróun helstu vísitalna á svæðinu í nótt:
- Nikkei vísitalan í Japan hækkaði um 2,30%
- Kospi vísitalan í Suður Kóreu lækkaði um 1,25%
- Taiwan Weighted lækkaði um 0,24%
- Hang Seng vísitalan í Hong Kong lækkaði um 0,38%
- Dow Jones Shanghai vísitalan stóð nánast í stað með 0,01% lækkun
- FTSE China A50 víistalan lækkaði um 0,14%
- IDX Composite vísitalan í Indónesíu lækkaði um 1,25%
- S&P/ASX 200 vísitalan lækkaði um 0,84%
- Dow Jones New Zealand vísitalan lækkaði um 0,34%