Laimdota Straujuma, forsætisráðherra Lettlands var í viðtali við Viðskiptablaðið í vikunni en hún var hér á landi í tilefni af ráðstefnunni Northern Future Forum.
Samhliða ráðstefnunni átti Straujuma fund með Sigmundi Davíð Gunnlaugssyni forsætisráðherra þar sem fjölmörg mál báru á góma. „Við ræddum þróun Evrópuhagkerfisins og stöðu Íslands í því auk þess sem við ræddum um málefni flóttamanna,“ segir hún. „Einnig fórum við yfir ástandið í Úkraínu, Sýrlandi og Rússlandi.“
Spurð að því hvort það sama hafi komið til umræðu á fundi hennar með David Cameron, forsætisráðherra Bretlands, segir hún að þau hafi rætt meira um stöðu Bretlands innan Evrópusambandsins. „Bretar munu bráðum ganga til atkvæða um það hvort þeir vilji áfram vera innan Evrópusambandsins, þannig að það er af nægu að taka. Við Cameron erum sammála um mikilvægi fjórfrelsisins – þ.e. frjáls flutnings fólks, fjármagns, varnings og þjónustu innan Evrópska efnahagssvæðisins. Við þurfum að viðhalda því. En ég er einnig sammála honum í því að ég tel að við þurfum að losa um regluverk innan Evrópusambandsins. Við þurfum að ræða betur hvernig regluverk er á milli landa innan ESB og utan þess.“
Nánar er fjallað um málið í Viðskiptablaðinu. Áskrifendur geta nálgast pdf-útgáfu af blaðinu með því að smella á hlekkinn Tölublöð .