Alvotech hefur gengið að tilboði frá hópi fagfjárfesta og viðurkenndra gagnaðila um sölu á 10,1 milljón almennra hlutabréfa í félaginu að verðmæti um 22,8 milljarðar króna á genginu 2.250 krónur á hlut eða sem samsvarar 16,41 dali á hlut.
Í kauphallartilkynningu Alvotech kemur fram að endanlegt bindandi tilboð hafi borist félaginu í morgun og hefur lyfjalíftæknifyrirtækið ákveðið að ganga að því.
„Alvotech hyggst nýta féð í almennan rekstur, til að styrkja framleiðslugetu og við að koma væntanlegum líftæknilyfjahliðstæðum á markað.“
Ekki er um að ræða hlutafjáraukningu heldur munu tilboðsgjafar fá afhent áður útgefin hlutabréf sem eru í eigu Alvotech í gegnum dótturfélagið Alvotech Manco ehf. Viðskiptin verða í gegnum Kauphöllina.
Alvotech tilkynnti á aðfaranótt laugardags að Matvæla- og lyfjaeftirlit Bandaríkjanna (FDA) hefði veitt félaginu leyfi til sölu og markaðssetningar í Bandaríkjunum á Simlandi (AVT02), sem líftæknilyfjahliðstæðu við Humira.
