Hlutabréfaverð Icelandair hefur lækkað um rúm 4% í morgun og stendur gengið í 1,09 krónum þegar þetta er skrifað.
Gengi flugfélagsins fór síðast undir eina krónu um haustið 2020 þegar Covid-faraldurinn lamaði flugsamgöngur.
Hlutabréfaverð Icelandair var rúmar tvær krónur síðasta sumar en í september síðastliðnum færði félagið afkomuspá sína niður fyrir árið, sér í lagi vegna krefjandi aðstæðna í fraktstarfsemi félagsins sem og hækkandi eldsneytisverði.
Um haustið tóku síðan við jarðhræringar á Reykjanesskaga sem og verkföll flugumferðastjóra.
Gengið tók örlítið við sér í janúar en samkvæmt kauphallartilkynningu í byrjun febrúar lækkaði sætanýting flugfélagsins talsvert milli ára á fyrsta mánuði ársins.
Í tilkynningu félagsins sagði að þrátt fyrir að jarðhræringar og eldgos á Reykjanesi í nóvember og desember hafi ekki raskað flugáætlun Icelandair, þá hafi alþjóðleg umfjöllun um atburðina haft veruleg áhrif á þróun bókana á fjórða ársfjórðungi sem sé mikilvægt sölutímabil flugferða í janúar.
Icelandair birti ársuppgjör í byrjun febrúar en félagið skilaði hagnaði í fyrra í fyrsta sinn í sex ár. Icelandair hagnaðist um 1,5 milljarða króna eftir skatta á árinu 2023, samanborið við 800 milljóna króna tap árið áður.
Hins vegar var afkoma fjórða ársfjórðungs undir væntingum.
Gengi flugfélagsins féll um 7% í fyrstu viðskiptum eftir uppgjörið en þrátt fyrir ágætis lausafjárstöðu en félagið töluvert skuldsett.
Vaxtaberandi skuldir og leiguskuldbindingar félagsins samkvæmt ársreikningi námu alls 638,6 milljónum Bandaríkjadala sem samsvarar 87,4 milljörðum króna á gengi dagsins. Skuldir flugfélagsins jukust um 40,7 milljónir dala í fyrra sem var þó að mestu vegna flugvélatengdra fjárfestinga.
Eigið fé nam 288,3 milljónum dala í lok árs og var eiginfjárhlutfall Icelandair 19%.