*

mánudagur, 22. apríl 2019
Innlent 12. apríl 2019 18:19

Bankastjóri Arion banka segir upp

Höskuldur H. Ólafsson, bankastjóri Arion banka, hefur sagt starfi sínu lausu.

Ingvar Haraldsson
Höskuldur H. Ólafsson, bankastjóri Arion banka.

Höskuldur H. Ólafsson, bankastjóri Arion banka, hefur sagt starfi sínu lausu. Stjórn bankans og Höskuldur hafa komist að samkomulagi um að hann sinni starfi bankastjóra fram til næstu mánaðarmóta.

Í tilkynningu frá bankanum er haft eftir Höskuldi að eftir skráningu bankans á markað í fyrra sé komið að öðrum að taka við.

„Nú eru um níu ár síðan ég kom til starfa hjá bankanum. Óhætt er að segja að verkefnin hafi verið fjölbreytt á þessum árum. Fyrstu árin fólst verkefnið fyrst og fremst í að takast á við skuldavanda viðskiptavina bankans, bæði fyrirtækja og heimila. Þá var hlutfall vandræðalána hjá bankanum vel yfir 50% en er í dag í takt við það sem best gerist hjá fjármálafyrirtækjum í löndunum í kringum okkur. Við tók uppbygging bankans og Arion banki er í dag með skýra framtíðarsýn, öflugan mannauð og í forystu hér á landi þegar kemur að þróun fjármálaþjónustu. Eftir vel heppnað alþjóðlegt hlutafjárútboð á síðasta ári var bankinn skráður á markað í kauphallir á Íslandi og í Svíþjóð og er eignarhald bankans í dag vel dreift og hluthafar bæði innlendir og erlendir fjárfestar. Bankinn er fjárhagslega sterkur með traustan grunnrekstur og vel í stakk búinn fyrir það sem framtíðin ber í skauti sér. Ég tel þetta vera rétta tímann til að fela öðrum að taka við keflinu,“ er haft eftir Höskuldi.

Brynjólfur Bjarnason, stjórnarformaður Arion banka, segir að Höskuldur skili af sér góðu búi. „Ég vil þakka Höskuldi fyrir hans mikilvæga þátt í þróun og uppbyggingu Arion banka á síðustu níu árum. Hans forysta og staðfesta hafa reynst bankanum vel í gegnum ýmsar áskoranir á þeim árum sem hann hefur verið við stjórnvölinn. Við í stjórn bankans virðum hans ákvörðun um að nú sé góður tímapunktur til að láta af störfum. Höskuldur skilar góðu búi þar sem bankinn nýtur sterkrar stöðu á þeim mörkuðum sem hann starfar á. Fyrir hönd stjórnar bankans þakka ég Höskuldi mikilvægt framlag í þágu bankans,“ segir Brynjólfur.

25 ára afmælistilboð VB!

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir út árið 2019. Innifalið í tilboðinu er:

  • - Viðskiptablaðið sent heim
  • - Vefaðgangur að vb.is
  • - Frjáls verslun sent heim
  • - Fiskifréttir sent heim