Björn Valur Gíslason hlaut í dag endurkjör sem varaformaður Vinstri grænna, en kosið var á landsfundi flokksins á Selfossi. Frá síðasta landsfundi hefur Björn Valur gegnt stöðunni og heldur hann því áfram.
Allt benti til þess að Björn Valur yrði sjálfkjörinn til embættisins en í gær ákvað Sóley Björk Stefánsdóttir að bjóða sig fram gegn honum. Björn Valur hlaut 93 atkvæði af 156 og Sóley Björk 50. 12 seðlar voru auðir og einn ógildur. Þakkaði Björn Valur fyrir stuðninginn að loknu kjöri.
„Ég kýs einnig að túlka aðdraganda þessa kjörs sem ábendingu um að ég geti gert betur,“ hefur mbl.is eftir Birni Val úr sigurræðu hans.
„Mikilvægast er þó að við göngum út af þessum fundi undir traustri forystu og Katrínar Jakobsdóttur og þeirrar stjórnar sem þið kjósið hér í dag, að við stundum heil að baki þeirri niðurstöðu sem hér mun verða.“
