Fjárfestar innleysa nú hlutdeildarskírteini í Kauphallarsjóðum Ark Invest í stórum stíl og hefur útflæði úr sex sjóðum eignastýringafyrirtækisins numið 2,2 milljörðum Bandaríkjadala á árinu.
Cathie Wood, forstjóri Ark Invest, er þekkt fyrir að taka mikla áhættu og geta sjóðir í virkri stýringu félagsins því sveiflast mikið.
Sem dæmi skilaði Kauphallarsjóðurinn ARKK Innovation, sem fjárfestir í tækni- og sprotafyrirtækjum um 68% ávöxtun í fyrra. Sjóðurinn skilaði 150% ávöxtun árið 2020 en síðan rýrnaði eignasafnið um 75% á árunum 2021 og 2022 áður en hann tók aftur við sér í fyrra.
Wood vakti mikla athygli fyrir fjárfestingastefnuna sína meðan heimsfaraldur Covid-19 reið yfir og voru fjárfestar æstir í að kaupa í alls kyns sjóðum Ark Invest.
Vaxtahækkanir síðustu ára hafa hins vegar haft afar neikvæð áhrif á afkomu Kauphallarsjóða í virkri stýringu Ark og eru fjárfestar nú byrjaðir að gefast upp á stefnunni.
Eignasafn sjóðanna sex í stýringu Ark hefur rýrnað um 30% á fyrstu fjórum mánuðum ársins samkvæmt The Wall Street Journal og er markaðsvirði þeirra um 11,1 milljarður Bandaríkjadala. Eignasafn sjóðanna stóð í 59 milljörðum dala árið 2021 þegar best lét.
Todd Rosenbluth, yfirmaður greiningardeildar VettaFi, segir í samtali við WSJ að þolinmæði fjárfesta sé á þrotum.
„Þetta ætti þó að verða ágætisár fyrir fjárfestingastefnu Ark þar sem tækni- og sprotafyrirtæki eru á uppleið, en þau hafa verið að einblína á fyrirtæki sem eru ekki að standa sig vel,“ segir Rosenbluth.
Vonir um lækkandi vexti og lægri fjármögnunarkostnað ættu að ýta gengi Kauphallarsjóða Ark upp á við en sú hefur ekki verið raunin nýverið. Aðalsjóður Wood, Ark innovation, hefur lækkað um 16% á árinu.
Samkvæmt WSJ er það vegna þess að Wood hefur ákveðið að einblína á að kaupa í fáum tæknifyrirtækjum hverju sinni. Sjö fyrirtæki mynda um helming af öllu eignasafni sjóðsins og þar af eru hlutabréf í Tesla meginþorrinn. Gengislækkun Tesla á árinu hefur því litað afkomuna.
