*

miðvikudagur, 14. nóvember 2018
Innlent 10. október 2016 10:39

Iceland græddi á íslenska landsliðinu

Bresk verslunarkeðja, íslenskur reifarahöfundur, skyrframleiðendur og fleiri græða á árangri landsliðsins.

Ritstjórn
european pressphoto agency

Guardian fjallar um árangur íslenska landsliðsins og áhrif þess á sölu á skyri, bókum og ferðum til landsins. Greinin birtist á vef breska blaðsins Guardian fyrir landsleikinn í gærkvöldi þar sem Ísland vann tyrkneska landsliðið 2-0.

Segja þeir að mjólkurbændur, flugfélög, fjárfestingarbankar og jafnvel breska verslunarkeðjan Iceland hafi grætt á árangri íslenska landsliðsins.

Bresk verslunarkeðja græddi á Íslandi

Verslunarkeðjan Iceland sem um tíma var í eigu íslenskra aðila, hélt úti auglýsingaherferð sem byggði á því að láta stuðningsmenn enska landsliðsins líta á íslenska landsliðið sem sitt annað stuðningslið. Reyndar í Skotlandi beindist herferðin að því að láta þá styðja við þá framar því enska.

„Þetta var bilað,“ sagði Andy Thompson, hjá Iceland Foods, sem er með um 2% markaðshlutdeild í Bretlandi. „Við náðum til um 72 milljón manna á meðan á mótinu stóð, og myndböndunum var deilt út nærri tveim milljón sinnum. Þetta voru náttúruleg samlegðaráhrif, bæði erum við lítilmagnar og bæði deilum við sama nafni.“

Í vikunni sem landsleikur Íslands var við England á meðan Evrópumeistaramótinu stóð var ein sú besta í netsölu fyrirtækisins.

Reifarahöfundur náði metsölu

Jafnframt fjallar greinin um aukna sölu á skyri og ferðum til Íslands, ásamt því að Gamma sé að opna útibú á ný í Bretlandi eftir að Ísland lokaðist af frá alþjóðamörkuðum í kjölfar hrunsins. Einnig tekur hún viðtal við metsölubókarhöfundinn Ragnar Jónsson en bókin Snjór sem gefin er út sem hluti af seríunni Dark Iceland kom út í Frakklandi í sumar.

Viðtal birtist við hann í frönskum fjölmiðlum þar sem hann klæddist landsliðstreytju um bókina og salan rauk upp. „Þetta varð ein söluhæsta bókin í Frakklandi yfir sumarið,“ sagði Ragnar. „Það gerðist strax. Mótið var fullkomin tímasetning.“

„Ykkar vandamál, ekki okkar"

Einnig er rætt við Ragnheiði Elínu Árnadóttur, iðnaðar og viðskiptaráðherra, meðal annars um styrkingu krónunnar og áhrif þess á breska ferðamenn á sama tíma og pundið hefur veikst. Nefna þeir sem dæmi að bjór hérlendis hefur farið á skömmum tíma frá því að kosta 7 pund í 9 pund.

„Heppilega þá er þetta ykkar vandamál, ekki okkar,“ segir Raghneiður Elín í gríni og segir áhugann ekki bara bundinn við Evrópu.

„Við höfum séð hann frá Bandaríkjunum, frá Asíu. Ég fór í viðtal við kínverska sjónvarpsstöð vegna áhuga þeirra á landinu vegna fótboltans. Fótboltinn hafði mikið og jákvæð áhrif. Þetta var auglýsingar og ímyndarherferð sem ekki er hægt að kaupa. Við höfum verið í brennidepli alþjóðafrétta áður, en þá fylgdi því að við vorum alræmd fyrir efnhagskreppuna 2008 og þegar eldfjallið [Eyjafjallajökull] gaus.“