*

mánudagur, 23. júlí 2018
Innlent 11. júlí 2018 11:50

Kynnisferðir í samstarf við Advania

Kynnisferðir hafa falið Advania að hýsa og reka upplýsingakerfi fyrirtækisins.

Ritstjórn
Aðsend mynd

Kynnisferðir hafa falið Advania að hýsa og reka upplýsingakerfi fyrirtækisins. Mæta á þörfum viðskiptavina Kynnisferða enn betur með efldri upplýsingatækni.

Kynnisferðir er eitt þeirra fyrirtækja sem hafa borið hitann og þungan af ferðamannastraumnum til Íslands á undanförnum árum. Fyrirtækið fagnar sínu fimmtugasta starfsári í ár en á þeirri hálfu öld hefur mannauðurinn öðlast mikla þekkingu á þjónustu við ferðamenn.

„Kynnisferðir hafa á framsækinn hátt aðlagast gjörbreyttu starfsumhverfi. Það er fyrst og fremst þekking og reynsla á ferðaþjónustu sem er grundvöllur að velgengni fyrirtækisins, ekki sérþekking á upplýsingatækni. Við hjá Advania getum séð til þess að tæknin sé í lagi,“ segir Sigurður Sæberg Þorsteinsson, framkvæmdastjóri rekstrarlausna Advania.

Með nýjum samningi ábyrgist Advania að halda upplýsingakerfum Kynnisferða gangandi, tryggja stöðugleika í rekstri þeirra og þjónusta notendur kerfanna. Þannig gefst Kynnisferðum aukið svigrúm til að einbeita sér að sinni kjarnastarfsemi.

„Við komumst því að þeirri niðurstöðu að það væri hentugra fyrir okkar rekstur að útvista þessum málum til Advania, svo við getum haldið áfram að gera það sem við kunnum best,“ segir Þórarinn Þór, framkvæmdastjóri viðskiptaþróunar Kynnisferða. 

Sigurður Sæberg bendir á að sífellt fleiri fyrirtæki sjái kosti þess að úthýsa kerfisrekstri til fyrirtækja á borð við Advania sem hafa fjárfest gríðarlega til að geta veitt sérhæfða og góða þjónustu. Þeim fari því fækkandi fyrirtækjunum sem halda úti tölvudeildum sem krefjast mikils mannafla og dýrra fjárfestinga í búnaði.