Mike Ashley, eigandi Sports Direct og knattpsyrnuliðsins Newcastle, hefur sent frá sér yfirlýsingu í kjölfar greiðslustöðvunar Debenhams þar sem hann kallar eftir því að ferlið verði stöðvað. Ashley sparar ekki stóru orðin í yfirlýsingunni.

Kröfuhafar keðjunnar tóku yfir hana í gær eftir að yfirtökutilboði Ashley var hafnað. Auðjöfurinn átti 30 prósent hlut í keðjunni en í kjölfar tíðinda liðins sólarhrings hefur honum verið bolað út.

„Líkt og vant er þá aðhöfðust stjórnmálamenn og reglugerðasmiðir ekkert á meðan Róm brann,“ segir í yfirlýsingunni. „Umræddir aðilar eru álíka gagnlegir og teketill úr súkkulaði.“

Í yfirlýsingunni sakar Ashley stjórn Debenhams um að hafa kokkað yfirtöku kröfuhafa upp með vanhæfni sinni eða jafnvel með samsæri þess efnis.

„Fall Debenhams er ekkert minna en skandall fyrir þjóðina en auðveldlega hefði mátt koma í veg fyrir hann ef stjórnin hefði kosið að vinna með stærstu hluthöfunum í stað þess að hindra framgang þeirra,“ segir Ashley.