Samkvæmt ársfjórðungslegu útlánakönnun Seðlabankans meðal viðskiptabankanna fjögurra (Íslandsbanki, Landsbankinn, Arion Banki og Kvika) hefur framboð á húsnæðislánum til heimila hafi aukist lítillega á síðustu þremur mánuðum.
Hins vegar kemur fram í könnunni að viðskiptabankarnir telji að framboð á lánum til heimila verði óbreytt á næstu sex mánuðum.
Í könnunni er spurt um mat þeirra á þróun framboðs og eftirspurnar eftir lánsfé og auk þess hvaða þætti þeir telji að hafi haft ráðandi áhrif á framboð á síðustu þremur mánuðum. Einnig er spurt um væntingar viðskiptabankanna um horfur næstu sex mánuði.
Viðskiptabankarnir greindu einnig frá minni lánsfjáreftirspurn heimila á síðustu þremur mánuðum og gera þeir ráð fyrir að eftirspurn minnki áfram á næstu sex mánuðum.
Þá telja bankarnir að samkeppni um útlán til heimila muni aukast lítillega á næstu sex mánuðum.
Bankarnir greina frá því að vextir á verðtryggðum útlánum til heimila hafi á heildina litið lítið breyst á síðustu þremur mánuðum og gera þeir ráð fyrir að svo verði áfram á næstu sex mánuðum.
Samkvæmt svörum bankanna hafa reglur um veitingu útlána til heimila lítið breyst á síðustu þremur mánuðum og gera þeir ráð fyrir að útlánareglur verði almennt óbreyttar á næstu sex mánuðum.
Eftirspurn fyrirtækja aukist lítillega
Í könnunni kemur fram að vextir á óverðtryggðum útlánum til heimila lækkuðu lítillega á síðustu þremur mánuðum vegna lægri fjármögnunarkostnaðar bankanna og gera bankarnir jafnframt ráð fyrir því að þeir lækki áfram á næstu sex mánuðum vegna væntinga um lægri fjármögnunarkostnað og meginvexti Seðlabankans.
Framboð lánsfjár til fyrirtækja hefur verið óbreytt á síðustu þremur mánuðum og gera þeir ráð fyrir að svo verði áfram á næstu sex mánuðum. Eftirspurn fyrirtækja eftir lánum í íslenskum krónum á síðustu þremur mánuðum hefur aukist lítillega og búast þeir við því að hún aukist einnig lítillega á næstu sex mánuðum.
Lægri vextir á næstu sex mánuðum
Reglur bankanna um lánveitingar til fyrirtækja hafa ekki breyst á síðustu þremur mánuðum samkvæmt könnuninni og gera þeir ráð fyrir óbreyttum reglum á næstu sex mánuðum.
Þá vænta bankarnir þess að samkeppni um fyrirtækjaútlán aukist á næstu sex mánuðum.
Vextir og vaxtaálag á útlánum til fyrirtækja voru óbreytt á síðustu þremur mánuðum samkvæmt niðurstöðunum en bankarnir búast við því að vextir lækki á næstu sex mánuðum vegna væntinga um þróun fjármögnunarkostnaðar bankanna og meginvaxta Seðlabankans.
