Bjarni Benediktsson forsætisráðherra segir það styrkleikamerki að útlendingar vilji fjárfesta í íslensku fjármálakerfi og vonast hann til þess að í framhaldi af sölunni á Arion banka sem Viðskiptablaðið hefur fjallað um verði hægt að skapa grundvöll fyrir dreifða eignaraðild að íslenskum fjármálafyrirtækjum.
Í samtali við RÚV segist Bjarni ekki hafa gert neina könnun á kaupendunum á nálega 30% hlut í bankanum, slíkt fari bara í sitt lögboðna ferli með aðkomu Fjármálaeftirlitsins.
Segir hann að beðið hafi verið frétta af því hvernig þeim sem tóku við slitabúi Kaupþings myndi ganga að koma Arion banka í hendur nýrra eigenda en nú séu þær línur aðeins að skýrast.
Auki líkur á skráningu á hlutabréfamarkað
Virðist honum við fyrstu sýn sem þetta lýsi tiltrú manna og auki mjög líkur á að takist að skrá bankann á hlutabréfamarkað. Þar með geti ríkið losað um sinn eignarhlut eins og stefnt hafi verið að svo í þessu séu því margar jákvæðar fréttir.
Jafnframt segir hann að það séu mikil tímamót í sjálfu sér að útlendingar lýsi áhuga á því að fjárfesta ekki bara á Íslandi í svona miklu umfangi, heldur í íslenska fjármálakerfinu í heild sinni.
Styrkleikamerki fyrir íslenskt fjármálakerfi
„[É]g held að það megi alveg segja að það sé styrkleikamerki fyrir fjármálakerfið að menn lýsi þeim áhuga í þessu tilviki,“ segir Bjarni enda sé bersýnilegt af öllum tölum um bankanna að þeir standi mjög traustum fótum í dag.
„Það eru ekki dæmi um það að erlendir aðilar hafi lýst áhuga á að fjárfesta í íslenskum fjármálafyrirtækjum, og lengi vel var það metið sem veikleikamerki.“
Að minnsta kosti annar bankinn verði seldur
Bjarni segir að með þessu séu Íslendingar að fjarlægast fjármálaáfallið, eins og hann kallar það sem í daglegu tali er kallað hrunið.
Vonar hann að í framhaldinu verði hægt að skapa grundvöll fyrir dreifða eignaraðild að íslenskum fjármálafyrirtækjum sem ætlunin sé að koma úr höndum ríkisins aftur til einkaaðila. Að minnsta kosti öðrum bankanum sem ríkið á nú.
