*

laugardagur, 18. ágúst 2018
Fólk 12. mars 2018 18:18

Hákon gengur til liðs við Mörkina

Hákon Stefánsson, fyrrverandi framkvæmdastjóri hjá Creditinfo, hefur gengið í eigendahóp lögmannstofunnar Markarinnar.

Ritstjórn
Hákon Stefánsson, meðeigandi á Mörkinni lögmannsstofu.
Aðsend mynd

Hákon Stefánsson, fyrrverandi framkvæmdastjóri alþjóðamarkaða hjá Creditinfo Group, hefur gengið til liðs við Mörkina lögmannsstofu þar sem hann verður einn af eigendum stofunnar.

Hákon starfaði áður hjá Creditinfo í 11 ár þar sem hann gegndi ýmsum stjórnunarstörfum, þar á meðal starfi framkvæmdastjóra lögfræðisviðs og starfi aðstoðarforstjóra.  Áður starfaði hann meðal annars hjá Lögfræðistofu Reykjavíkur og sem bæjarlögmaður hjá Akureyrarbæ.  Hákon hefur gegnt stjórnarformennsku í LÍN og Sjúkratryggingum Íslands, auk þess sem hann hefur gengt stjórnarformennsku í fjölmörgum félögum á Íslandi og erlendis.  Hákon mun samhliða starfi sínu hjá Mörkinni sitja í stjórn Creditinfo. 

Hákon útskrifaðist frá lagadeild Háskóla Íslands árið 1998 og öðlaðist héraðsdómslögmannsréttindi 1999.

“Ég vil bjóða Hákon velkominn í eigendahóp lögmannsstofunnar en reynsla hans úr atvinnulífinu og alþjóðaviðskiptum, sem og þekking hans á réttarsviðum tengdum fyrirtækjarekstri, stjórnsýslu og persónuvernd, mun styrkja okkur enn frekar í að veita viðskiptavinum okkar framúrskarandi þjónustu” segir Gestur Jónsson, hæstaréttarlögmaður og einn eigenda Markarinnar lögmannsstofu, í fréttatilkynningu.

Mörkin lögmannsstofa var stofnuð árið 1975 og veitir hún alhliða lögfræðiþjónustu og ráðgjöf, svo sem á sviði vinnuréttar, samkeppnisréttar, félagaréttar, stjórnsýsluréttar og refsiréttar.