*

sunnudagur, 22. október 2017
Innlent 4. október 2017 12:12

SÍ: Hagstjórnin ræður aðhaldsstiginu

Seðlabankinn segir minnkandi verðbólguþrýsting ástæðu stýrivaxtalækkunar, en hann hefur áhyggjur af hagstjórninni.

Ritstjórn
Birgir Ísl. Gunnarsson

Peningastefnunefnd Seðlabanka Íslands segir eina af ástæðum þess að hún ákvað í morgun að lækka stýrivexti að horfur séu á minni hagvexti í ár en í fyrra.

Jafnframt hefur verðbólga hjaðnað síðustu mánuði, en bankinn bendir á að aðahaldsstig peningastefnunnar muni ráðast af framvindu efnahagsmála og annarri hagstjórn.

Viðskiptablaðið greindi frá því í morgun að peningastefnunefnd Seðlabanka Íslands hafði ákveðið að lækka vexti bankans um 0,25 prósentur, þvert á spár bankanna. Meginvextir bankans, vextir á sjö daga bundnum innlánum, verða því 4,25%.

Í yfirlýsingunni segir:

„Horfur eru á minni hagvexti í ár en í fyrra, m.a. vegna þess að hægt hefur á vexti ferðaþjónustu. Hagvöxtur verður þó áfram töluvert mikill. Vísbendingar eru um að farið sé að draga úr spennu í þjóðarbúskapnum.

Verðbólga hefur hjaðnað nokkuð sl. tvo mánuði og í september mældist hún 1,4%. Mælikvarðar á undirliggjandi verðbólgu eru enn lægri og hjaðnandi. Gengi krónunnar hefur lítið breyst frá síðasta fundi nefndarinnar, eftir lækkun sl. sumar, og er 4,5% hærra en á sama tíma í fyrra. Mælikvarðar á verðbólguvæntingar eru í nokkuð góðu samræmi við verðbólgumarkmiðið. Gengissveiflur undanfarinna mánaða hafa haft tiltölulega lítil áhrif á verðbólgu og skammvinn áhrif á verðbólguvæntingar.

Spenna í þjóðarbúskapnum kallar á peningalegt aðhald svo að tryggja megi verðstöðugleika til meðallangs tíma. Þróun verðbólgu og verðbólguvæntinga auk minnkandi spennu benda þó til þess að raunvextir bankans nægi við núverandi aðstæður til þess að verðbólga verði að jafnaði við markmið. Aðhaldsstig peningastefnunnar á komandi misserum mun ráðast af framvindu efnahagsmála og annarri hagstjórn.“