Bláa lónið opnar í haust nýtt upplifunarsvæði, hágæða hótel og veitingastað. Fyrirtækið undirbýr nú ráðningar á starfsfólki í tengslum við verkefnið. Á annað hundrað fjölbreytt störf verða til í tenglsum við uppbygginguna. Þetta kemur fram í fréttatilkynningu.
Framkvæmdir við bæði upplifunarsvæðið og hótelið eru veg á vel komnar. Hótelið verður staðsett í hraunbreiðunni vestan við núverandi lón. Nafn hótelsins er Moss Hotel og spa, upplifunarsvæðið mun heita Lava Cove. Nýr hágæðaveitingastaður, Moss Restaurant, verður starfræktur á hótelinu.
Leita af 165 starfsmönnum
„Um 165 manns munu starfa við Lava Cove og hótelið og verða störfin afar fjölbreytt. Á næstu dögum mun Bláa lónið auglýsa eftir móttökustjórum og móttökustarfsmönnum, stjórnendum og starfsfólki í herbergisþjónustu- og þrifum, einkaþjónum og starfsfólki gestamóttöku. Þjálfun og starfsþróun eru mikilvægir þættir í mannauðsstefnu Bláa lónsins og fá allir starfsmenn þjálfun er lýtur að hágæðaþjónustu.
Bláa Lónið er í dag eitt þekktasta vörumerki Íslands og hefur National Geographic valið Bláa lónið sem eitt af 25 undrum veraldar.
Moss Hotel verður 62 herbergja hótel og verður í hærri gæðaflokki en áður hefur þekkst á Íslandi. Öll þjónusta og aðbúnaður miða að því að gestirnir njóti þess besta í mat, gistingu og upplifun í umhverfi Bláa lónsins,“ segir í tilkynningunni.
Fara undir yfirborð jarðar
Gestir sem sækja heim Lava Cove koma til með að fara undir yfirborð jarðar þar sem þeir munu njóta spa meðferða og upplifunar sem byggir á virkum efnum Bláa lónsins. Þaðan hafa gestir aðgang að nýju lóni.
Dagný Pétursdóttir framkvæmdastjóri Bláa lónsins segir: „Opnunin á nýju upplifunarsvæði og hóteli næsta haust verður mikilvægur áfangi í starfsemi Bláa Lónsins. Með þessu erum við að þróa og breikka starfsemi okkar. Lykillinn að þeim árangri sem við höfum náð á undanförnum árum byggir á einstakri náttúru Bláa lónsins og einlægum vilja starfsfólks okkar til að veita gestum frábæra þjónustu og skapa ógleymanlegar minningar. Á næstu vikum munum við leita að fólki sem hefur brennandi áhuga á að taka þátt í áframhaldandi uppbyggingu með okkur.“
Hér má sjá fleiri myndir: