Fyrrum ráðamenn í ríkisstjórn Donalds Trump, fyrrverandi forseta og forsetaframbjóðanda, hafa ásamt fleirum úr kosningateymi Trump sett aðgerðaráætlun á blað um hvernig forsetinn geti skert sjálfstæði bandaríska seðlabankans.
The Wall Street Journalgreinir frá þessu í morgun en um er að ræða tíu blaðsíðna plagg þar sem farið er yfir aðgerðir sem Trump getur ráðist í verði hann forseti á næsta ári.
Samkvæmt WSJ kemur fram í skjalinu alls konar hugmyndir um hvernig forsetinn getur haft áhrif á stefnu seðlabankans en það sem vekur mestan ugg eru hugmyndirnar um hvernig Trump gæti sjálfur komið að því að ákveða stýrivexti í Bandaríkjunum.
Þeir sem koma að gerð aðgerðaráætlana færa rök fyrir því að Trump ætti að taka þátt í því að ákvarða vexti í Bandaríkjunum sem og að forseti Bandaríkjanna ætti að þurfa samþykkja stefnubreytingar seðlabankans.
Hópurinn kemst einnig að þeirri niðurstöðu að Donald Trump ætti að geta rekið Jerome Powell seðlabankastjóra úr starfi þrátt fyrir að skipunartíma hans ljúki ekki fyrr en 2026.
The Wall Street Journal tókst ekki að fá staðfest hvort Trump sjálfur kom að gerð skjalsins eða hvort hann hafi samþykkt innihald þess með einhverjum hætti.
Í yfirlýsingu frá Susie Wiles og Chris LaCivitia ráðgjöfum í kosningateymi Trumps segir að ef stefnubreytingar af þessu tagi komi ekki beint frá Trump sjálfum er ekki búið að taka endanlega ákvörðun um hvort þær verði framkvæmdar.
