Samkvæmt The Wall Street Journal eru það notendur samfélagsmiðilsins Truth Social sem eru að þrýsta upp genginu á Digital World Acquisition, sérhæfða yfirtökufélaginu sem er ætlað að fara með miðilinn á markað.
Afar fáir fagfjárfestar eru að kaupa bréf í DWA en gengi SPAC-félagsins hefur hækkað um 140% á árinu.
Hluthafar Truth Social kjósa nú um hvort það eigi að fara með samfélagsmiðilinn á markað. Ef svo verður er áætlað að hlutur Donald Trump, fyrrum Bandaríkjaforseta og stofnandi samfélagsmiðilsins, sé metinn á um 3,5 milljarða Bandaríkjadali.
Trump hefur gengið treglega að leggja fram 454 milljón dala tryggingu vegna sektargreiðslu sem hann var dæmdur til að greiða fyrir að hafa ýkt virði eigna sinna til að fá betri lánakjör.
Ef marka má umræðu í um 8 þúsund manna þræði á Truth Social er ljóst að nær allir þeir sem eru að kaupa bréf í DWA séu að því til að styðja Trump.
Samfélagsmiðlanotendur Truth Social og hluthafar í DWA segjast vera að gefa forsetaframbjóðandanum fjárhagslega líflínu.
Í engu samræmi við virði Truth Social
DWA er orðið nýjasta jarmbréfið (e. meme stock) á markaði vestanhafs en kaupþrýstingurinn er sambærilegur nú og þegar netnotendur þrýstu upp genginu á tölvuleikjaversluninni GameStop.
Samfélagsmiðillinn Truth Social er hins vegar einstaklega óarðbær og hefur gert lítið annað en að brenna peninga frá stofnun. Fyrirtækið skilaði tekjum í fyrsta sinn frá stofnun 2021 í fyrra en tapaði engu að síður 49 milljónum dala.
Gengi DWA er hins vegar í kringum 43 dali á hlut og segir Krist Marvin, forstjóri SPACInsider, í samtali við WSJ að það sé engu samræmi við virði Truth Social.
Auðkenni hins sameinaða félags verður DJT sem eru upphafsstafir Donald Trump.