Stuðningsmenn Donald Trump, fyrrverandi forseta Bandaríkjanna, eru á góðri leið með því að skila honum um 3,5 milljörðum Bandaríkjadala sem ætti að vera meiri en nóg til að koma forsetaframbjóðandanum úr fjárhagsvanda sínum.
Trump hefur gengið treglega að leggja fram 454 milljón dala tryggingu vegna sektargreiðslu sem hann var dæmdur til að greiða fyrir að hafa ýkt virði eigna sinna til að fá betri lánakjör.
Samkvæmt The Wall Street Journal er fasteignaveldi Trump metið á um 3 milljarða Bandaríkjadala en The New York Times greinir frá því að hann sé einungis með 350 milljónir dala í handbæru fé.
Samkvæmt WSJ hefur Trump gengið illa að fá lán gegn veði í fasteignum sínum og að þá gæti það reynst honum dýrt að fara selja eignir með hraði enda er ólíklegt að hann fengi viðunandi verð fyrir.
Sérhæfða yfirtökufélagið (e. SPAC) Digital World Acquisition er hins vegar orðið nýjasta jarmbréfið (e. meme stock) á markaði vestanhafs en WSJ greinir frá því að félaginu sé ætlað að setja samfélagsmiðilinn Truth Social á markað.
Stuðningsmenn Trump hafa verið að þrýsta verðinu upp og hækkaði gengi DWA um 18% í gær. Dagslokagengið var 43 dalir á hlut en sé miðað við það er markaðsvirði Truth Social um 6 milljarðar Bandaríkjadala.
Markaðsvirði í engu samsræmi við tekjur
Trump stofnaði Truth Social árið 2021 eftir að Twitter lokaði á aðgang hans að samfélagsmiðlunum. Fyrirtækið hefur tapað tugmilljónum Bandaríkjadala frá stofnun og hafa fjárfestar meðal annars verið sakaðir um innherjasvik.
Tekjur samfélagsmiðilsins á síðustu þremur árum ná rétt í 5 milljónum Bandaríkjadala og seldi félagið breytanleg skuldabréf fyrir 40 milljónir Bandaríkjadala til að halda sér á floti nýverið.
Þetta skiptir þó engu máli svo lengi sem samfélagsmiðillinn sameinast sérhæfða yfirtökufélaginu.
Auðkenni hins sameinaða félags yrði upphafsstafir forsetans DJT en Trump myndi eiga um 60% í félaginu eftir skráningu og yrði hlutur hans metinn á 3,5 milljarða Bandaríkjadali.
Hluthafar Truth Social, sem eru allt stuðningsmenn Trump, eiga eftir að samþykkja sameininguna en samkvæmt WSJ gæti samfélagsmiðilinn verið kominn á markað strax í næstu viku.
Trump mætti þó ekki selja bréfin sín fyrr en sex mánuðum eftir útboðið. Hann gæti þó engu að síður tekið lán með veð í bréfunum eða gert framvirka samninga með þau.
Það er þó ólíklegt að hlutabréfaverðið verði óbreytt í septembermánuði og gæti verðið jafnvel hrunið vegna söluþrýstings þegar losnar um bréf Trump.