Tekjur Símans á fyrsta ársfjórðungi námu um 6,6 milljörðum króna samanborið við 6,3 mill-jarða á sama tímabili 2023. Um 4,4% tekjuaukningu er að ræða en tekjur af kjarnaþjónustum Símans, farsíma, gagnaflutningi og sjónvarpsþjónustu aukast um rúmlega 7% á milli tímabila.
Rekstrarhagnaður fyrir afskriftir og fjármagnsliði (EBITDA) nam 1,4 milljörðum króna á fyrsta fjórðungi og hækkar um 120 milljónir eða 9,1%. EBITDA hlutfallið er 21,8% á 1F 2024 en var 20,9% á sama tímabili 2023. Rekstrarhagnaður (EBIT) nam 431 m.kr. á 1F 2024 samanborið við 318 m.kr. á sama tímabili 2023.
„Tekjur, EBITDA og EBIT aukast milli ára á fyrstu mánuðum ársins sem er ánægjulegt, og eins og stefnt var að. Óvenju mikil hreyfing var á fjarskiptamarkaðinum, sem alla jafna er þó afar líflegur, en fyrsti fjórðungur einkenndist af mikilli nýsölu hjá Símanum en einnig meira brottfalli en fyrr. Rífleg inngöngutilboð tiltekinna markaðsaðila höfðu þar talsverð áhrif um nokkurra vikna skeið,” segir Orri Hauksson, forstjóri Símans.
Hrein fjármagnsgjöld námu 195 milljónum á tímabilinu sem er töluverð hækkun úr 1 milljón á sama tímabili 2023.
„Vaxtagjöld hafa hækkað en einnig voru vaxtatekjur af skuldabréfi vegna sölu Mílu á 1F 2023. Fjármagnsgjöld námu 375 m.kr., fjármunatekjur voru 183 m.kr. og gengistap nam 3 milljónum,“ segir í árshlutauppgjöri Símans
Hagnaður á tímabilinu dróst þá saman milli ára og nam 171 milljónum samanborið við 246 milljón króna hagnað á sama tímabili 2023.
Vaxtaberandi skuldir samstæðu að leiguskuldbindingum meðtöldum námu 16,2 milljörðum króna í lok fjórðungsins en voru 10,5 milljarðar í árslok 2023.
„Á kostnaðarhlið rekstrar samstæðunnar gekk flest eftir eins og við mátti búast, utan þess að starfslok eins framkvæmdastjóra voru gjaldfærð. Nýlegir kjarasamningar voru í takt við vænt-ingar okkar og flestir kostnaðarliðir fyrirsjáanlegir og samkvæmt væntingum. Síminn heldur áfram að vera fremur skuldlétt félag, þótt fyrirtækjakaup á fjórðungnum hafi að hluta verið fjármögnuð með nýju lánsfé. Álag á þær skuldir sem félagið aflar á markaði er með því hag-stæðasta sem þekkist á Íslandi en hátt vaxtastig hefur engu að síður töluverð áhrif.“
Handbært fé Símans í lok fyrsta fjórðungs nam 2 milljörðum en var 1,8 milljarðar í árslok 2023. Staða útlána hjá Símanum Pay var 2,9 milljarðar í lok tímabilsins og jókst lítilsháttar á fjórðungnum.
Eiginfjárhlutfall Símans var 44,4% í lok fyrsta ársfjórðungs og eigið fé 18,1 milljarðar.
„Á fyrirtækjamarkaði verður á næstunni boðið upp á sterkara vöruúrval en fyrr, meðal annars með nýju fyrirtækjakreditkorti, uppfærðri símavist og bættum netkerfum. Vöruframboð til auglýsenda tók stakkaskiptum með því að Síminn eignaðist Billboard og tengd félög. Fram á við getur samstæðan þannig boðið auglýsendum fjölbreyttar leiðir til að ná til þeirra markhópa sem þeir kjósa. Við fögnum nýjum meðlimum Símafjölskyldunnar og uppfærum afkomuspá fyrir samstæðuna í heild með tilliti til innkomu þeirra, sem og horfur út árið.”
