*

mánudagur, 24. september 2018
Innlent 4. september 2018 08:02

Framboð nýbygginga hefur aukist

Á fyrstu sjö mánuðum ársins voru íbúðir í nýbyggingum 18% allra íbúða sem auglýstar voru til sölu á höfuðborgarsvæðinu.

Ritstjórn
Haraldur Guðjónsson

Framboð af nýbyggingum á íbúðamarkaði hefur aukist talsvert það sem af er þessu ári. Þetta kemur fram í nýrri mánaðarskýrslu frá Íbúðalánasjóði. Á fyrstu sjö mánuðum ársins voru íbúðir í nýbyggingum, það er íbúðir með byggingarár skráð í ár eða í fyrra, samtals 18% allra íbúða sem auglýstar voru til sölu á höfuðborgarsvæðinu. Á sama tíma í fyrra var sambærilegt hlutfall 11% og því hefur nýbyggingum fjölgað umfram aðrar íbúðir í sölu. Almennt virðist sala á nýjum íbúðum ganga vel en meðalsölutími nýbyggðra íbúða er nú um 20 dögum styttri en fyrir ári síðan. Ásett fermetraverð í nýbyggingum var að meðaltali um 17% hærra en í öðrum íbúðum á höfuðborgarsvæðinu á fyrri helmingi ársins. Þetta er á meðal þess sem kemur fram í nýrri mánaðarskýrslu Íbúðalánasjóðs.

Mun meiri hækkun húsnæðiskostnaðar á Íslandi en hinum Norðurlöndunum

Á undanförnum þremur árum hefur kaupverð íbúða á Íslandi hækkað um 40% en kostnaður við viðhald og tryggingar vegna húsnæðis hefur hækkað um 13% samkvæmt tölum evrópsku hagstofunnar Eurostat. Húsnæðiskostnaður þeirra sem búa í eigin húsnæði hefur því alls hækkað um 30% á þremur árum. Undanfarin ár hefur húsnæðiskostnaður vegna eigin húsnæðis hækkað mun meira á Íslandi en á hinum Norðurlöndunum. Stærsta ástæða þess að húsnæðiskostnaður þeirra sem kaupa húsnæði hefur hækkað meira á Íslandi en annars staðar á Norðurlöndum eru miklar hækkanir íbúðaverðs hér á landi, sérstaklega í fyrra.

Konur líklegri en karlar til þess að vera á leigumarkaði

Um 18% landsmanna 18 ára og eldri telja líklegt að þau verði á leigumarkaði eftir hálft ár. Til samanburðar eru um 16% landsmanna á leigumarkaði og því eru fleiri sem ætla sér að vera á leigumarkaði en eru þar nú þegar. Konur eru marktækt líklegri en karlar til þess að vera á leigumarkaði en 18% kvenna leigja húsnæði sitt samanborið við 12% karla samkvæmt nýjustu könnun Íbúðalánasjóðs. Konur eru einnig marktækt líklegri en karlar til þess að ætla sér að vera á leigumarkaði eftir hálft ár.

Lægstu vextir íbúðalána hafa hækkað

Vextir á íbúðalánum hafa almennt farið lækkandi undanfarin ár en í sumar dró þó til tíðinda þegar lægstu verðtryggðu vextirnir hækkuðu lítillega. Í byrjun júní voru lægstu verðtryggðu vextir íbúðalána 2,4% en nú eru þeir um 2,5%. Þetta er í fyrsta skipti sem lægstu vextir á verðtryggðum íbúðalánum hækka síðan í mars í fyrra.

Íbúðaskuldir heimilanna vaxa áfram

Íbúðaskuldir heimilanna hafa nú vaxið um 5,3% að raunvirði á undanförnum 12 mánuðum. Þessi hækkunartaktur hefur farið vaxandi að undanförnu og nú er svo komið að íbúðaskuldir hafa ekki vaxið hraðar að raunvirði undanfarinn áratug. Verðtryggð lán eru um 81% allra íbúðaskulda en óverðtryggð lán um 19%.