*

mánudagur, 10. desember 2018
Innlent 25. október 2018 18:29

Spítalinn í gamla í hús 365 miðla

Skrifstofur Landspítalans flytjast í 5 þúsund fermetra húsnæði gamla Tónabæ og IBM á Íslandi í Skaftahlíð.

Ritstjórn
365 miðlar sem runnu að hluta til í Vodafone, sem er með húsnæði á Suðurlandsbraut, hafa verið í húsinu sem hýsa mun skrifstofur Landspítalans í framtíðinni. Áður var þar félagsmiðstöðin Tónabær.
Haraldur Guðjónsson

Landspítalinn og Reitir undirrituðu í dag, 25. október 2018, langtímaleigusamning um skrifstofuhúsnæði að Skaftahlíð 24. Um er að ræða tvær byggingar sem hýstu áður 365 miðla og eru samtals um fimm þúsund fermetrar að stærð.

Framkvæmdir sem miða að því að aðlaga húsnæðið að þörfum skrifstofa Landspítala hefjast strax að því er segir í fréttatilkynningu frá Reitum.

Byggingarnar við Skaftahlíð 24 hafa báðar hýst 365 miðla á undanförnum árum. Syðra húsið sem snýr að Miklubraut er þó líklega þekktast fyrir starfsemi Tónabæjar sem var þar á árunum 1968 til 2000. En byggingin sem stendur norðar á lóðinni hýsti lengi skrifstofur IBM á Íslandi (nú Origo).

Gamla stórstúkan verður göngudeild

Samhliða þessu var undirritaður nýr leigusamningur um núverandi húsnæði aðalskrifstofu Landspítala við Eiríksgötu 5, en því húsnæði verður breytt í göngudeild.

Húsið við Eiríksgötu 5, Eiríksstaðir, var reist af Stórstúku Íslands á árunum 1964-1968. Húsið var kallað Templarahöllin, þar voru haldin vinsæl böll og bingó. Árið 1999 var húsinu breytt og það stækkað. Húsið hefur hýst starfsemi á vegum Landspítala til margra ára.

Um Reiti

Reitir fasteignafélag er stærsta þjónustufyrirtæki landsins á sviði útleigu á atvinnuhúsnæði segir í tilkynningunni. Starfsemin felst í eignarhaldi og útleigu atvinnuhúsnæðis sem er að stærstum hluta verslunar- og skrifstofu­húsnæði á höfuð­borgar­svæðinu.

Fasteignir félagsins eru um 140 talsins, um 465 þúsund fermetrar að stærð. Meðal fasteigna má nefna stærstan hluta verslunar­mið­stöðvar­innar Kringlunnar, Spöngina, Hótel Borg, Hilton og skrif­stofu­byggingar í Höfðabakka 9 ásamt húsnæði höfuðstöðva Sjóvár, Origo og Advania. Stærstu leigutakar Reita eru Hagar, Flugleiðahótel, ríki og sveitarfélög. Reitir fögnuðu 30 ára starfsemi á árinu 2017.

Stikkorð: 365 miðlar Reitir Skaftahlíð Tónabær