Samkvæmt árshlutauppgjöri Tivoli A/S sem rekur skemmtigarðinn Tívolí í Kaupmannahöfn jukust tekjur samstæðunnar um 46% á fyrsta fjórðungi í samanburði við sama tímabil í fyrra.
Tekjur á fyrsta fjórðungi námu 90,4 milljónum danskra króna sem samsvarar um 1,8 milljörðum íslenskra króna.
EBITDA-framlegð Tívolí var þó neikvæð um 84,2 milljónir danskra króna sem samsvara 1,7 milljörðum króna. Mun það vera þó minna tap en var á rekstrinum en á fyrsta fjórðungi 2023 þegar EBITDA- framlegð Tívolí var neikvæð um 96,7 milljónir danskra króna.
Í uppgjörinu segir að tekjuaukninguna á fyrsta fjórðungi megi rekja til þess hversu snemma páskarnir voru í ár. Gestir Tívolí voru 221 þúsund á fjórðungnum sem er 470% fækkun frá sama tímabili í fyrra þegar gestir voru 47 þúsund.
„Fyrsti fjórðungur ársins 2024 er að mestu leyti í samræmi við væntingar þrátt fyrir mikla fjölgun gesta á milli ára. Við horfum á sumarið með björtum augum,“ segir Susanne Mørch Koch, forstjóri Tívolí.
Sumardagskrá Tívólí hófst 22. mars í ár en uppgjörið tekur til tímabilsins
Færri Norðmenn og Svíar
Afkomuspá samstæðunnar fyrir árið er óbreytt og reiknar Tívólí með því að tekjur verði um 1,2 milljarðar danskra króna á árinu og hagnaður um 110 milljónir danskra króna sem samsvarar um 2,2 milljörðum íslenskra króna.
Í ársuppgjöri Tívolí fyrir árið 2023 voru gestir skemmtigarðsins um 4 milljónir og er búist við sambærilegum fjölda í ár.
Gríðarlegur samdráttur var í fyrra á gestum frá nærliggjandi svæðum eins og Noregi og Svíþjóð en samhliða því var mikil aukning á gestum frá öðrum svæðum.
Samkvæmt horfum félagsins fyrir árið segir að óvissa ríki um hversu margir gestir frá öðrum svæðum verða í ár samhliða því að kostnaður við rekstur Tívolí hefur aukist til muna vegna vaxta- og verðbólguálags.
