Hlutabréfaverð líftæknilyfjafyrirtækisins hefur hækkað um 23% í aprílmánuði og hefur gengið farið úr 1.620 krónum í 1.995 krónur eftir viðskipti dagsins.
Um 600 milljón króna velta var með gengi félagsins í dag og fór gengið upp um tæp 4%. Hlutabréf í fyrirtækinu lækkuðu töluvert í marsmánuði og fóru úr 2.180 krónum í 1.620 krónur sem samsvarar um 26% lækkun.
Hlutabréfaverð Alvotech byrjaði að hækka undir lok síðasta árs en rauk síðan upp í janúar og febrúar þegar von var á niðurstöðu úttektar Lyfja- og matvælaeftirlits Bandaríkjanna (FDA) á framleiðslustöðu fyrirtækisins.
Þann 26. febrúar gekk Alvotech að tilboði frá hópi fagfjárfesta í almennra hlutabréfa í félaginu að verðmæti um 22,8 milljarðar króna á genginu 2.250 krónur á hlut. Dagslokagengi Alvotech eftir viðskiptin var 2.450 krónur og hafði þá aldrei verið hærra.
Gengið lækkaði nær stöðugt síðan þá þangað til í apríl. Í síðustu viku kynnti fyrirtækið langtíma sölu- og dreifingarsamning í Bandaríkjunum líftæknilyfjahliðstæðu Alvotech í háum styrk með útskiptileika við Humira.
Hlutabréfaverð Sýnar lækkaði um 4% í viðskiptum dagsins en fjarskipta- og fjölmiðlafélagið sendi frá sér neikvæða afkomuviðvörun eftir lokun markaða á miðvikudaginn.
Áætlað er að rekstrarhagnaður samstæðunnar á fyrsta fjórðungi verði um 120 milljónir samanborið við 428 milljónir á sama tímabili í fyrra.
Hlutabréfaverð fjárfestingafélagsins Skeljar lækkaði síðan um 2% í afar lítilli veltu og var dagslokagengið 16,4 krónur. Fjárfestingafélagið greindi frá afkomu rekstrarfélaga í sinni eigu fyrir opnun markaða í morgun en afkoma þeirra var umfram áætlanir.
Úrvalsvísitalan OMXI 15 lækkaði um 0,01% og var heildarvelta á markaði 2,4 milljarðar.