Danska kaupsýslukonan Eva Berneke hefur ákveðið að stíga úr stjórn Lego samstæðunnar eftir 13 ára stjórnarsetu.
Þetta kemur fram í kauphallartilkynningu Lego en Børsen greinir frá.
Eva er forstjóri franska gervihnattarfyrirtækisins Eutelsat en fyrirtækið og Eva hafa sætt mikilli gagnrýni fyrir að halda áfram að þjónusta rússneskar sjónvarpsstöðvar eftir innrás Rússa í Úkraínu.
Hvorki Eva né Lego hafa greint frá ástæðum þess að hún sé að kveðja stjórn fyrirtækisins.
„Eva hefur verið mikilvægur hlekkur í stjórn fyrirtækisins á tímum gríðarlegs vaxtar. Við þökkum henni fyrir þau jákvæðu áhrif sem hún hefur haft á fyrirtækið í meiri en áratug,” segir Thomas Kirk Kristiansen, stjórnarformaður Lego, í Kauphallartilkynningu.
Hollendingurinn Ebi Atawodi, sem er í stjórnunarstöðu hjá Google og Youtube, og Finninn Ilkka Paananen, sem er stofnandi og forstjóri finnska leikjafyrirtækisins Supercell, koma inn í stjórnina í stað Evu.