*

föstudagur, 16. nóvember 2018
Innlent 17. ágúst 2018 15:49

VÍS hefur allt að 300 milljóna endurkaup

Hámarksfjöldi hluta sem áætlunin kveður á um að verði keyptir eru að nafnverði kr. 26.500.000 hlutir, en það jafngildir um 1,36 % af útgefnu hlutafé félagsins.

Ritstjórn
Helgi Bjarnason, forstjóri VÍS.
Eva Björk Ægisdóttir

Á aðalfundi Vátryggingafélags Íslands hf. þann 22. mars 2018 var samþykkt að heimila stjórn, í þeim tilgangi að koma á viðskiptavakt með hluti í félaginu og/eða til að setja upp formlega endurkaupaáætlun, að kaupa á næstu 18 mánuðum allt að 10% af hlutafé félagsins. Þetta kemur fram í tilkynningu til Kauphallarinnar. 

Stjórn VÍS hefur á grundvelli fyrrgreindrar samþykktar tekið ákvörðun um framkvæmd endurkaupaáætlunar um kaup á eigin bréfum í þeim tilgangi að lækka útgefið hlutafé þess.

Hámarksfjöldi hluta sem áætlunin kveður á um að verði keyptir eru að nafnverði kr. 26.500.000 hlutir, en það jafngildir um 1,36 % af útgefnu hlutafé félagsins. Fjárhæð endurkaupanna verður þó aldrei hærri en kr. 300.000.000  Heimildin gildir til 31. desember 2018.

Endurkaupin verða gerð af Kviku banka hf. sem tekur allar viðskiptaákvarðanir er varða kaup á hlutum og tímasetningu kaupanna óháð félaginu.

Framkvæmd endurkaupaáætlunar verður í samræmi við lög um hlutafélög og viðauka við reglugerð um innherjaupplýsingar og markaðssvik.

Verð fyrir hvern hlut skal að hámarki vera hæsta verð í síðustu óháðu viðskiptum eða hæsta fyrirliggjandi óháða kauptilboð í viðskiptakerfi Nasdaq á Íslandi, hvort sem er hærra. Hámarksmagn hvers viðskiptadags er 1.101.926 hlutir sem var fjórðungur meðalveltu júlí mánaðar 2018. Viðskipti félagsins með eigin hluti í samræmi við endurkaupaáætlunina verða tilkynnt í samræmi við lög og reglugerðir.

Endurgjald fyrir keypta hluti skal ekki vera hærra en sem nemur verði síðustu óháðu viðskipta eða hæsta fyrirliggjandi óháða kauptilboði í Kauphöll Íslands, hvort sem er hærra. VÍS á 4.231.696 hluti í félaginu á þessum tímapunkti.

Endurkaup vátryggingafélaga í þeim tilgangi að lækka hlutafé eru háð samþykki Fjármálaeftirlitsins.

Stikkorð: VÍS