Markaðsvirði stoðtækjaframleiðandans Össurar hefur hækkað um rúmleg 4,7 milljarða danskra króna það sem af er þessu ári eða því sem nemur tæplega 90 milljörðum íslenskra króna. Markaðsvirði félagsins í kauphöllinni í Kaupmannahöfn nemur nú um 18 milljörðum danskra króna eða um 340 milljörðum íslenskra króna. Við lokun markaða á miðvikudag stóð gengi bréfa félagins í 42,2 dönskum krónum á hlut og hefur hækkað um 35% það sem af er ári. Þá hefur  hlutabréfaverðið  hækkað um rúmlega 50% á síðustu 12 mánuðum.

Sterk byrjun á árinu

Samkvæmt dönskum greiningaraðilum sem Viðskiptablaðið ræddi við hefur hækkun ársins verið drifin áfram af tveimur þáttum. Í fyrsta lagi skilaði félagið sterku uppgjöri á fyrsta ársfjórðungi en hagnaður félagsins nam 14,1 milljón dollara á tímabilinu og jókst um 37% frá sama tíma í fyrra. Þá námu tekjur félagsins 160 milljónum dollara og jukust um 13% og nam innri vöxtur á tímabilinu 8%. Hefur þetta orðið til þess að auka væntingar um að fyrirtækið hækki afkomuspá sína fyrir árið í ár en í áætlunum félagsins er gert ráð fyrir að innri vöxtur verði á bilinu 4-5% í ár.

Innri vöxtur á fjórðungnum var drifinn áfram út af sterkum vexti í stoðtækjavörum sem nam um 10% en stoðtæki stóðu fyrir 54% af tekjum á fjórðungnum. Þá var einnig góður gangur í sölu á spelkum og stuðningsvörum þar sem innri vöxtur nam 5%. Greinendur búast einnig við góðum vexti á öðrum ársfjórðungi þá sérstaklega vegna nýrrar útgáfu af Proprio gervigreindarfætinum sem kom á markað á fyrsta ársfjórðungi. Félagið mun birta uppgjör fyrir annan ársfjórðung þann 25. júlí næstkomandi. Í öðru lagi hefur lækkandi vaxtastig það sem af er ári ýtt undir hærra verð á öflugum fyrirtækjum í stöðugum vexti eins og Össur

Verðið í samræmi við markaðinn

Ef litið er á kennitölur samanburðafyrirtækja Össurar kemur í ljós að hlutabréfaverð félagsins er í takt við aðra framleiðendur á heilbrigðistækjum á Norðurlöndum sem hafa að meðaltali hækkað um tæplega 30% það sem af er ári.

Framreiknað V/H hlutfall félagsins fyrir árið í ár er 31,3 en meðaltal samanburðarfyrirtækja er 34,5. Ef horft er á sama hlutfall fyrir næsta ár er V/H hlutfall Össurar 27,2 en meðaltalið 29,4. Framreiknað EV/EBITDA hlutfall félagsins fyrir árið í ár 18,1 og meðaltalið 23,1. EV/ EBITDA er heildarvirði fyrirtækis, þ.e. samanlagt markaðsvirði hlutafjár og vaxtaberandi skulda deilt með hagnaði fyrir afskriftir, fjármagnsgjöld og skatta.

Nánar er fjallað um málið í Viðskiptablaðinu. Áskrifendur geta nálgast blaðið undir Tölublöð , aðrir geta skráð sig í áskrift hér .