Alphabet, móðurfélag Google, hefur rekið 28 starfsmenn sem tóku þátt í mótmælum gegn Nimbus-verkefni Google.
Um er að ræða 1,2 milljarða dala samning Google og Amazon við ríkisstjórn Ísrael um að sjá um gagnaský fyrir Ísraelsríki.
Mótmælin áttu sér stað á skrifstofum Google víðs vegar um Bandaríkin en mótmælendur fóru í setuverkfall á skrifstofum fyrirtækisins. Mótmælunum var varpað í beinni á streymisveitunni Twitch.
Samkvæmt Bloomberg voru níu handteknir í mótmælunum sem fóru fram síðastliðinn þriðjudag.
Þeir starfsmenn sem tóku þátt í mótmælunum fengu skilaboð frá mannauðsdeild Google í gær að kröftum þeirra væri ekki óskað lengur innan fyrirtækisins.
Alls voru 28 reknir en samkvæmt Google eru fleiri starfsmenn til rannsóknar.
