Fyrirtæki sem stunda rafmyntagröft hafa verið að hamstra Bitcoin upp á síðkastið í von um að rafmyntin muni hækka í verði til að bæta upp fyrir yfirvofandi tap fyrirtækjanna er framboðið skerðist á föstudaginn.
Skráð fyrirtæki í rafmyntagreftri líkt og Marathon Digital, CleanSpark og Bitfarms sitja nú á Bitcoin fyrir um 2,8 milljarða Bandaríkjadali, samkvæmt The Miner Mag en Financial Times greinir frá.
Frá og með föstudeginum mun daglega framboðið á bitcoin, sem fyrirtæki í rafmyntagreftri fá fyrir að staðfesta millifærslur með rafmyntinni, fara úr 900 niður í 450 bitcoin.
Viðskiptamódelið háð hækkunum bitcoin
Um er að ræða breytingu sem var teiknuð inn þegar rafmyntin var stofnuð en framboðið lækkar á fjögurra ára fresti til að verjast verðbólgu.
Samkvæmt FT hafa vogunarsjóðir verið að skortselja fyrirtæki í rafmyntagreftri lengi en margir þeirra sjá fyrir sér að þegar framboðið helmingast muni arðsemi nást.
Hlutabréfaverð fyrirtækja sem stunda rafmyntagröft hefur lækkað töluvert á árinu en um er að ræða iðnað sem eyðir töluverðu magni af tekjum sínum í orku og tækninýjungar til að geta keppst um hverja einustu rafmynt.
„Þetta er viðskiptamódel sem byggir töluvert á þeirri trú að verð á Bitcoin muni hækka og eftirspurn aukast,“ segir Larisa Yarovaya, prófessor í fjármálum við Háskólann í Southampton, í samtali við FT.
Samkvæmt The Miner Mag eru rafmyntagrafarar með um 46.200 bitcoin í varasjóðum. Hlutfallið hefur ekki verið hærra síðan í maí 2022 þegar verðhrun rafmyntarinnar neyddi rafmyntagrafara til að selja úr varasjóðum.
Bandaríska fyrirtækið Cleanspark sat á meira en 5.000 bitcoin í lok mars sem er um 2.400% aukning frá mars 2023. Marathon Digital sat á 17.300 bitcoin sem er 50% aukning frá sama tímabili í fyrra.
„Allir eru vongóðir um að verðið á bitcoin muni halda áfram að hækka og leysa vandamálið sem fylgir skerðingunni,“ segir Matther Schultz, stjórnarformaður CleanSpark við FT.
Bjartsýni fjárfesta á rafmyntamarkaði er ekki úr lausu lofti gripinn er bitcoin hefur hækkað um 121% síðastliðna sex mánuði. Ákvörðun verðbréfaeftirlits Bandaríkjanna að leyfa kauphallarsjóði með rafmyntum spilar þar stórt hlutverk.
Bitcoin náði hámarki í 73.800 dölum um miðjan mars en hefur síðan lækkað um 14% og fór undir 60.000 dalina í gær. Stendur gengið í um 62.000 dölum núna.
Þessi bjartsýni hefur þó ekki stöðvað vogunarsjóði í því að skortselja fyrirtæki í rafmyntagreftri. Sem dæmi eru um 24% af hlutabréfum Marathon á láni samkvæmt S&P Global Market.
Fyrirtækin hafa einnig verið í basli með að skila hagnaði en þau eru mörg hver mjög skuldsett eftir mikla sókn eftir bjartsýnismarkaðinn árið 2021 sem endaði með verðhruni á rafmyntinni.
