Samdráttur varð að raunvirði á kortaveltu innlendra greiðslukorta í mars frá sama mánuði í fyrra.
Kortavelta nam um 113 milljörðum króna og jókst um 1,1% í krónum talið en þegar leiðrétt er fyrir þróun verðlags og gengi krónu nam samdráttur kortaveltunnar í heild sinni 1,4% milli ára, samkvæmt greiningardeild Íslandsbanka.
„Samdráttur kortaveltu innanlands nam 3,8% að raunvirði en erlendis jókst hún um 2,4% á sama mælikvarða. Að okkar mati er þessi þróun skýrt merki um kaldara hagkerfi og áhrif hárra stýrivaxta á eftirspurn,“ segir í greiningu bankans.
Þróunin kemur þó ekki á óvart þar sem páskar voru snemma þetta árið. Í raun þykir greiningardeildinni aukningin erlendis heldur hófleg nema þá að stór hluti neyslu landsmanna í páskaferðum erlendis muni koma fram í tölum aprílmánaðar.
Hærri kortavelta erlendis mun því að öllum líkindum teygja sig að hluta yfir í apríl þar sem páskar voru um mánaðamót.
„Viðsnúningur varð á þróun einkaneyslu á síðasta ári eftir hraðan vöxt árin tvö á undan. Á fyrri helmingi ársins jókst einkaneyslan en á seinni helmingi varð samdráttur samkvæmt bráðabirgðatölum Hagstofunnar. Á seinasta fjórðungi síðasta árs nam samdráttur einkaneyslu þannig 2,3%” segir í greiningu Íslandsbanka.
Þá bendir kortavelta fyrsta fjórðungs þessa árs til samdráttar einkaneyslu á fjórðungnum.