Verð á hlutabréfum í tryggingarfélaginu TM hækkaði um 2,64% í 62 milljóna króna viðskiptum í Kauphöllinni í dag. Fyrr í dag sendi TM frá sér jákvæða afkomuviðvörun þar sem fram kom að afkoma félagsins á örðum ársfjórðungi hafi verið talsvert betri heldur en rekstrarspá gerði ráð fyrir.
Heimavellir hækkuðu mest í viðskiptum dagsins eða um 6,84% í 1 milljónar króna viðskiptum. Þá hækkaði Sjóvá um 1,1% í 18 milljóna króna viðskiptum í dag.
Verð á hlutabréfum í Icelandair lækkaði um 1,81% í 191 milljón króna viðskiptum í Kauphöllinni í dag. Kvika lækkaði um 1,46% í 27 milljóna króna viðskiptum í dag.
Hlutabréfavísitala Aðalmarkaðarins lækkaði um 0,28% í Kauphöllinni í dag en heildarviðskipti námu 1,6 milljörðum króna.
