*

mánudagur, 24. september 2018
Innlent 30. ágúst 2018 13:39

Afgangur borgarinnar í takt við áætlun

Afgangur af rekstri A- og B hluta Reykjavíkurborgar nam 9,15 milljörðum króna á fyrri árshelmingi, rétt rúmu prósenti undir áætlun.

Ritstjórn
Dagur B. Eggertsson, borgarstjóri Reykjavíkurborgar.
Haraldur Guðjónsson

A- og B hlutar Reykjavíkurborgar skiluðu 9,15 milljarða króna afgangi á fyrri hluta ársins, rúmu prósenti undir áætlun, og aðeins tæpur helmingur þess 18,6 milljarða króna afgangs sem var á rekstri borgarinnar á sama tímabili í fyrra.

Afgangur A-hluta var rúmir 3,7 milljarðar, rúmlega tvöfalt yfir þeim tæpu 1,8 milljörðum sem spáð hafði verið.

Rekstrartekjur samstæðunnar námu rúmum 90 milljörðum, sem er 7% aukning frá fyrra ári, en rekstrargjöld 74,4 milljörðum, rúmlega 6% meira.

Í tilkynningu um málið eru helstu frávik frá áætlun samstæðu sögð mega rekja til lægri tekjufærðra matsbreytinga fjárfestingaeigna Félagsbústaða og hærri fjármagnsgjalda samstæðunnar vegna gangvirðisbreytinga innbyggðra afleiða í raforkusamningum hjá Orkuveitu.

Heildareignir samstæðunnar námu í lok júní 598 milljörðum króna, heildarskuldir ásamt skuldbindingum 302 milljörðum, og eigið fé því 296 milljörðum, en þar af var hlutdeild meðeigenda tæpir 16 milljarðar. Eiginfjárhlutfall er 49,6%, en var 49,0% um síðustu áramót.

Stikkorð: Reykjavíkurborg