*

miðvikudagur, 22. nóvember 2017
Innlent 24. janúar 2017 09:29

Eimskip kaupir Mareco í Belgíu

Eimskip hefur fest kaup á 80% hlut í frystimiðlunarfyrirtækinu Mareco í Belgíu. Ársvelta fyrirtækisins nemur um 60 milljónum evra.

Ritstjórn
Gylfi Sigfússon, forstjóri Eimskips.
Haraldur Guðjónsson

Eimskip hefur fest kaup á 80% hlut í frystimiðlunarfyrirtækinu Mareco í Belgíu. Ársvelta fyrirtækisins nemur um 60 milljónum evra eða um 7,3 milljörðum króna og flutt magn er um 32 þúsund gámaeiningar. Á ætlað er að fjárfestingin nemi um 16,6 milljónir evra eða um 2 milljarða króna, en endanleg fjárhæð ræðst af rekstrarárangri fyrirtækisins á árinu 2016.

Kaup eru fjármögnuð með handbæru fé og lánsfé. Mareco verður hluti af samstæðu Eimskips frá og með byrjun þessa árs.

„Fyrirtækið var stofnað árið 2002 og eru höfuðstöðvar þess í Antwerpen í Belgíu. Núverandi stjórnendateymi mun áfram eiga 20% hlut í fyrirtækinu og stýra rekstri þess. Mareco hefur á að skipa 26 starfsmönnum á tveim stöðum, 22 í Antwerpen og fjórum í Sao Paulo í Brasilíu. 

Mareco leggur áherslu á frystiflutninga, einkum á útflutning víðs vegar að úr heiminum til Vestur-, Mið- og Suður-Afríku. Helstu vörutegundir eru sjávarafurðir, kjúklingur, svínakjöt og nautakjöt. Ársvelta fyrirtækisins nemur um 60 milljónum evra eða um 7,3 milljörðum króna, EBITDA hlutfall er á bilinu 5-6% og nemur flutt magn um 32 þúsund gámaeiningum á ári,“ segir í fréttatilkynningu frá Eimskip.

Styrkir landfræðilegt þjónustunet Eimskips í frystiflutningum

„Í tengslum við fjárfestingarverkefni Eimskips hefur félagið samið við Íslandsbanka um lánalínu til 18 mánaða að fjárhæð 47 milljónir evra. Vegna kaupanna á Mareco hafa 7 milljónir evra verið dregnar á línuna.

Kaupin á Mareco styrkja landfræðilegt þjónustunet Eimskips í frystiflutningum, sérstaklega á svæðum í Afríku og Suður-Ameríku, og eykur fjölbreytni í frosnum afurðum. Þjónustunet Mareco styður við möguleika samstæðunnar á að leita nýrra tækifæra á nýjum markaðssvæðum og styður við frekari þróun á frystiflutningsþjónustu Eimskips,“ er enn fremur tekið fram.

Segir breytinguna auka fjölbreytileika

„Við erum ánægð með að Mareco er nú orðið hluti af samstæðu Eimskips og fyrirtækið mun styrkja frekar frystiflutningsþjónustu okkar með útvíkkun á þjónustuframboði Eimskips, bæði hvað varðar nýja vöruflokka og ný landsvæði. Breytingin mun einnig auka fjölbreytileika okkar og dýrmæt reynsla stjórnenda og starfsmanna Mareco mun hjálpa til við að styrkja okkar alþjóðlegu flutningsmiðlunarþjónustu,“ segir Gylfi Sigfússon, forstjóri Eimskips við tilefnið.

„Við höfum þekkt Eimskip í mörg ár og erum mjög ánægð með að verða hluti af samstæðu Eimskips þar sem við teljum að við getum lagt félaginu til mikla þekkingu og reynslu. Fyrirtækin tvö hafa fram til þessa lagt áherslu á ólíka markaði og vörutegundir og við sjáum þess vegna fram á að þau muni hafa hag af reynslu hvors annars þegar sótt er inn á nýja markaði,“ er jafnframt haft eftir Koen Jansen, framkvæmdastjóra Mareco.