Á fundi borgarráðs í dag lýstu borgarráðsfulltrúar Sjálfstæðisflokksins yfir miklum áhyggjum af rekstri Reykjavíkurborgar sem þeir segja að hafi verið í algjörum ólestri allt þetta kjörtímabil sem og kjörtímabilið 2010-2014 í höndum Samfylkingar og Besta flokksins.
Halldór Halldórsson, oddviti Sjálfstæðisflokksins var ómyrkur í máli í viðtali við Viðskiptablaðið. „Það er búið að vera gegnum gangandi tap á rekstrinum síðan Jón Gnarr og Dagur B. Eggertsson tóku við stjórnartaumunum árið 2010. Það er 16,2 milljarða skuldaaukning milli áranna 2014 og 2015 á A-hlutanum“.
Halldór telur að meirihlutinn reyni að setja reksturinn í fegurri búning með því að birta fréttatilkynningu þar sem segir að rekstrarniðurstaða A og B hluta sé neikvæð um tæpa 5 milljarða kr. Sú staðreynd að rekstrarniðurstaða A-hluta hafi hinsvegar verið neikvæð um 13,6 milljarða sé sláandi.
„Þau ráða ekkert við þetta Píratar, vinstri græn, Björt Framtíð og Samfylkingin,“ segir Halldór.
Aðspurður um hvað Halldór telji betur hafa mátt fara í rekstri borgarinnar segir hann að Sjálfstæðisflokkurinn hafi t.d. ítrekað bent á að það hafi verið of mikill slaki á nýráðningum. „Frá árinu 2010 hafa bæst við 244 ný stöðugildi. Það eru tæpir tveir milljarðar sem það kostar á ári. Hér er um að ræða óútskýrð stöðugildi. Maður áttar sig ekki á þessu, ef það er slaki í svona málum þá ræður þú ekki við reksturinn. Reksturinn er í vandræðum, afhverju er ekki sett á ráðningarbann?“
Halldór segir að Sjálfstæðisflokkurinn hafi jafnframt lagt fram allskonar tillögur um frestanir á framkvæmdum sem flokkurinn taldi að mættu bíða á meðan náð væri tökum á rekstrinum en meirihlutann hafi fellt allar slíkar tillögur.