Hlutabréfaverð matvælafyrirtækisins Bakkavarar, sem Ágúst og Lýður Guðmundssynir eiga meirihluta í, hefur hækkað um 40% það sem af er ári og stendur gengið í 118 pensum þegar þetta er skrifað.
Bakkavör, sem er skráð í Kauphöllina í Lundúnum, hefur átt góðu gengi að fagna síðustu mánuði en tekjur félagsins námu um 2.203 milljónum punda í fyrra sem samsvarar um 383 milljörðum íslenskra króna á gengi dagsins.
Verðbólgan eykur ásókn í vörur Bakkavarar
Rekstrarhagnaður jókst töluvert á milli ára og fór úr 37,8 milljónum punda í 97,1 milljón pund árið 2023. Handbært fé félagsins jókst um 49,8 milljónir punda á árinu og stóð í 103 milljónum við árslok 2023.
Um 84% af öllum tekjum Bakkavarar koma í gegnum Bretlandsmarkað en þrátt fyrir að félagið hafi verið að sækja fram í Bandaríkjunum og Kína er reksturinn þar ekki orðinn arðbær.
Í ársuppgjöri Bakkavarar sem birtist í lok mars segir að breskir neytendur, ólíkt Bandaríkjamönnum, hafi verið að glíma við þráláta verðbólgu og séu þeir því meira meðvitaðir um verð og gæði matvara. Í uppgjörinu segir að um 61% breskra neytenda séu að velja ódýrari matvörur til að reyna að draga úr kostnaði við matarinnkaup.
„Þetta á einnig við í Kína þar sem hæg endurreisn efnahagskerfisins hefur slegið á bjartsýni neytenda og dregið úr eyðslu,“ segir í uppgjörinu en um 5,5% af tekjum samstæðunnar kemur frá Kína.
Bakkavör segist finna teljandi mun á aðsókn neytenda í matvörur á viðráðanlegu verði líkt og flatbökur.
Aukinn framfærslukostnaður í Bretlandi hefur leitt til þess að 67% Breta segjast ætla að sækja veitingastaði í minna magni á næstu mánuðum. Stefnir Bakkavör því á að sækja fram þar sem neytendur sæki þess í stað í ferskar tilbúnar máltíðir í matvöruverslunum.
Samkvæmt fyrirtækinu ætla um 65% matvöruverslana að auka vægi tilbúinna ferskra máltíða í hillum sínum á næstu 12 mánuðum.
Félagið hefur einnig hagrætt á kostnaðarhliðinni með því að loka tveimur framleiðslustöðum í Bretlandi.
Eignarhlutur bræðranna um 60 milljarða virði
Markaðsvirði Bakkavarar stendur í um 678 milljónum punda sem samsvarar um 119 milljörðum íslenskra króna á gengi dagsins. Bakkavör er í 50,2% eigu Ágústs og Lýðs Guðmundssona, sem stofnuðu Bakkavör árið 1986. Eignarhlutur bræðranna stendur í 340 milljón pundum sem samsvara um 60 milljörðum króna.
Um miðjan janúar stóð eignarhlutur bræðrana í 256 milljónum punda að markaðsvirði eða um 44,6 milljörðum króna.
Virði eignarhlutar þeirra hefur því aukist um tæpa 16 milljarða á rúmum þremur mánuðum en lítil breyting hefur verið á gengi krónunnar gagnvart pundinu á tímabilinu.
Í byrjun árs keypti sjóður í stýringu hjá bandaríska fjárfestingarfélaginu LongRange um 116,5 milljónir hluta eða um 20,1% eignarhlut á 99 milljónir punda.
Seljandinn er félag tengt bandaríska vogunarsjóðnum Baupost Group sem seldi allan eignarhlut sinn í Bakkvör. Með sölunni lauk hluthafasamkomulagi Baupost Group við Bakkavör, sem hófst í nóvember 2017.
Patrick Cook, fulltrúi Baupost í stjórninni, steig einnig til hliðar.
Bakkavör gerði hluthafasamkomulag við LongRange sem felur m.a. í sér að Robert Berlin tekur sæti í stjórn Bakkavarar sem fulltrúi bandaríska fjárfestingarfélagsins. Berlin sat áður í stjórn Bakkavarar á árunum 2016-2018.
LongRange, sem var stofnað árið 2019, er með um 1,7 milljarða dala í stýringu. Bandaríska fjárfestingarfélagið segist horfa til langs tíma við fjárfestingarákvarðanir og að fjármögnun þess megi að stórum hluta rekja til stofnanafjárfesta.
