*

laugardagur, 15. maí 2021
Erlent 29. apríl 2021 12:05

Sala á iPhone eykst um 66%

Hagnaður Apple á fyrsta ársfjórðungi nam 2.900 milljörðum króna, 1,4% minna en landsframleiðsla Íslands á síðasta ári.

Ritstjórn
Tim Cook, forstjóri Apple
EPA

Tekjur Apple á fyrsta fjórðungi ársins námu nærri 90 milljörðum dala og jukust um 54% milli ára, töluvert umfram væntingar greiningaraðila sem höfðu spáð 77 milljarða dala tekjum. Financial Times greinir frá. 

Hagnaður netrisans á ársfjórðungnum hækkaði um 110% milli ára og nam 23,6 milljörðum dala, eða um 2.900 milljarðar króna miðað við núverandi gengi krónunnar. Til samanburðar var verg landsframleiðsla á Íslandi á öllu síðasta ári um 2.941 milljarður króna. Apple er verðmætasta skráða fyrirtæki heims en markaðsvirði félagsins er um 2.243 milljarðar dala í dag. 

Tekjur af iPhone vega 54% af heildartekjum Apple

Nýja 5G útgáfan af iPhone virðist hafa slegið í gegn en alls jókst sala á snjallsímunum um 66% milli ára. Tekjur af iPhone námu 47,9 milljörðum dala, eða um 54% af heildartekjum Apple á fjórðungnum. 

Söluvelta af Mac tölvunum jókst um 70% milli ára og vó um 10% af heildartekjum Apple. iPad spjaldtölvurnar voru einnig mjög vinsælar í faraldrinum en salan á þeim hækkaði um 79% milli ára og var um 8,7% af heildartekjum á fjórðungnum. 

Sjá einnig: Apple kaupir fyrirtæki á mánaðarfresti

Minnsti vöxturinn var í flokki aukahlutir, sem inniheldur m.a. Apple Watch og AirPods, en sala í þessum flokki jókst um 25% milli ára. Vöxtur í þjónustuflokki fyrirtækisins, sem inniheldur App Store, var um 27%, um tíu prósentustigum umfram væntingar. 

Netrisinn gerir þó ráð fyrir að skortur á örflögum muni hafa um 3-4 milljarða dala neikvæð áhrif á heildarsölu á núverandi ársfjórðungi. 

Stikkorð: Apple iPhone