Hagnaður Festi á fyrsta ársfjórðungi nam 202 milljónum króna sem er töluverður viðsnúningur frá fyrsta ársfjórðungi 2023 þegar félagið skilaði 91 milljón króna tapi.
Vörusala samstæðunnar nam 32,2 milljörðum króna á tímabilinu samanborið við 29,5 milljarða árið áður og jókst því um 9,3% milli ára.
Samkvæmt árshlutauppgjöri félagsins nam framlegð af vöru- og þjónustusölu 7 milljörðum kórna og jókst um 806 milljónir eða 12,9% á milli ára.
„Verð á hrávörum helst áfram hátt líkt og í fyrra en óvissuástand á mörkuðum ríkir enn vegna stríðsástands í Úkraínu og fyrir botni Miðjarðarhafs. Almennar launahækkanir á vinnumarkaði tóku gildi á fjórðungnum sem hækka launakostnað um rúmlega 5% að óbreyttu. Verðbólga og vextir eru áfram háir sem hafa áhrif á vöruverð og allan rekstrarkostnað. Mikil áhersla er lögð áfram á lækkun alls rekstrarkostnaðar með bættum ferlum og aukinni sjálfvirkni,“ segir Ásta S. Fjeldsted, forstjóri Festi.
Laun og starfsmannakostnaður jókst um 7,5% en stöðugildum fjölgaði um 2,5% milli ára.
EBITDA nam 1,9 milljörðum samanborið við 1,4 milljarða árið áður sem er um 35,5% hækkun milli ára. Í uppgjörinu segir Ásta að horfur fyrir árið eru góðar en fram undan er sumarið sem er mikilvægasti tími ársins í rekstri samstæðunnar.
EBITDA spá félagsins fyrir árið 2024 er hækkuð um 300 milljónir og er nú 11,5 – 11,9 milljarðar króna.
Handbært fé frá rekstri nam 538 milljónum eða 7,6% af framlegð, samanborið við 1,2 milljarða árið áður.
„Góður gangur er heilt yfir í rekstri félaganna. Áhersla er áfram lögð á tekjuvöxt og bætingu framlegðar en um leið aðhald í rekstrarkostnaði. Útlitið fyrir árið er gott en næstu mánuðir eru lykilmánuðir í rekstri samstæðunnar með fjölda ferðafólks sem við erum tilbúin að þjónusta um land allt,” segir Ásta.
Eigið fé nam 35,1 milljarði og var eiginfjárhlutfallið 36,0% í lok tímabilsins 2024.