Rekstrartekjur fasteignafélagsins Grósku ehf. námu 945 milljónum króna í fyrra samkvæmt ársreikningi félagsins sem er hækkun úr 699 milljónum árið áður. Tekjur félagsins hafa aukist jafnt og þétt en þær voru í kringum 159 milljónir árið 2021.
Félagið rekur og leigir út skrifstofu- og atvinnuhúsnæði að Bjargargötu 1 í Reykjavík. Tekjur félagsins af fasteigninni í Vatnsmýrinni hafa aukist jafnt og þétt en byggingu lauk í lok árs 2020.
Gróska er að mestu í eigu Björgólfs Thors Björgólfssonar, Andra Sveinssonar og Birgis Más Ragnarssonar, meðeigenda hjá Novator í gegnum félagið BAT Real Estate S.á.r.l sem er skráð í Lúxemborg.
Matshækkun á fjárfestingareignum nam 23,3 milljónum króna í fyrra í samanburði við 681,5 milljón króna hækkun árið 2022.
Heildarafkoma ársins var neikvæð um 267,5 milljónir króna eftir jákvæða afkomu upp á 182,7 milljónir árið 2022.
Handbært fé frá rekstri nam 145,6 milljónum. Samkvæmt efnahagsreikningi í árslok 2023 námu eignir samstæðunnar 14,8 milljörðum króna. , en þar af eru fjárfestingareignir 12.7 milljarðar.
Eigið fé var 3.451 milljarðar og eiginfjárhlutfall 23,2%.
„Á árinu 2023 hlaut bygging Grósku að Bjargargötu 1 lokaúttekt og húsið fært á byggingarstig 7. Gróska er að mestu komin í útleigu til traustra leigutaka sem byggja á sameiginlegu markmiði Grósku að efla nýsköpunarsamfélagið á Íslandi. Dagleg starfsemi á árinu fólst í að þjónusta þá leigutaka sem aðsetur hafa í Grósku, innrétta rými fyrir nýja leigutaka en á komandi ári mun nýr veitingastaður opna í Grósku og hlökkum við til að halda áfram að skapa aðstæður til samskipta og tengsla, hvort sem það er innan hússins eða við fræðasamfélag háskólasvæðisins,” segir í ársreikningi félagsins.
Gróska lauk í fyrra við endurfjármögnun á framkvæmdalánum með veðskuldabréfi að fjárhæð 3.615 m. kr. og ber verðtryggða breytilega vexti með lokagjalddaga í september 2028.
Stjórn Grósku leggur til að það verði ekki greiddur arður til hluthafa á árinu 2024.