Rekstrarniðurstaða Kópavogsbæjar fyrir fjármagnsliði árið 2023 var jákvæð um 2,7 milljarða sem er hækkun úr 1,3 milljörðum árið 2022. Rekstrarniðustaðan eftir gjöld og fjármagnsliði var þó neikvæð um 753 milljónir.
Skuldaviðmið bæjarfélagsins lækkaði úr 95% í 91% sem er vel undir lögbundnu hámarki sem er 150% samkvæmt sveitarstjórnarlögum.
Í Kauphallartilkynningu Kópavogsbæjar segir að ársreikningurinn endurspegli „traustan rekstur sveitarfélagsins“ sem hefur styrkst verulega milli ára.
Nær engar lóðaúthlutanir voru á árinu með tilheyrandi tekjum.
Í ár mun bæjarfélagið hins vegar úthluta lóðum í Vatnsendahvarfi og fyrsta úthlutun lóða á næstunni. Kópavgosbær stefnir að því að úthluta öllum lóðum í Vatnsendahvarfi á árinu sem mun skila sér inn í niðurstöðu ársreiknings 2024.
„Rekstur Kópavogsbæjar styrkist umtalsvert milli ára sem endurspeglar ríka áherslu okkar á traustan rekstur. Þannig er afgangur af rekstri bæjarins fyrir fjármagnsliði 1,4 milljörðum hærri en í fyrra þrátt fyrir að lífeyrisskuldbinding hækki um 1,3 milljarð milli ára. Þá er verulegt styrkleikamerki að veltufé frá rekstri eru fimm milljarðar króna og eykst um tæpa tvo milljarða milli ára. Veltufé frá rekstri er algjör lykiltala í ársreikningi og er það svigrúm sem reksturinn gefur til að standa undir framkvæmdum og afborgunum lána,” segir Ásdís Kristjánsdóttir, bæjarstjóri Kópavogs.
Fjárfestingar og framkvæmdir í eignum bæjarins námu um 5,2 milljörðum króna. Viðamesta framkvæmdin er nýbygging Kársnesskóla við Skólagerði sem kostaði um 1,1 milljarð.
„Skuldastaða bæjarins er heilbrigð þrátt fyrir miklar fjárfestingar í leik- og grunnskólum og öðrum nauðsynlegum innviðum samfélagsins. Skuldahlutfall Kópavogsbæjar fer áfram lækkandi og er langt undir lögbundnu skuldaviðmiði.
Krefjandi rekstrarumhverfi, mikil verðbólga og háir vextir lita enn heildarniðurstöðu ársins og leiða til þess að fjármagnskostnaður er verulega umfram áætlun. Verkefnið nú sem endranær er að standa vörð um góðan rekstur þannig að áfram sé unnt að veita góða þjónustu en á sama tíma lækka skatta á bæjarbúa,“ segir Ásdís.
Skuldaviðmið A- og B-hluta lækkar frá fyrra ári og er 91%, var 95% í árslok 2022. Skuldaviðmið A-hluta er 82%.
Vaxtaberandi skuldir í ársreikningi fyrir 2023 eru ríflega 35 milljarðar. Heildarskuldir og skuldbindingar Kópavogsbæjar hækka úr 54 í 58 milljarða eða rúm 7%. Þannig lækka skuldir að raunvirði ef tekið er tillit til verðbólgu sem var 8% á árinu 2023.
Veltufé frá rekstri samstæðunnar, A- og B-hluta, hækkar í tæpa fimm milljarða úr rúmlega þremur milljörðum króna frá fyrra ári.
Eigið fé samkvæmt samanteknum efnahagsreikningi A- og B-hluta í árslok 2023 nam 38,3 milljörðum króna en eigið fé A-hluta nam 18,4 milljörðum króna.
