Markús Sigurbjörnsson, hæstaréttardómari og fyrrverandi forseti Hæstaréttar, átti hlutabréf fyrir tugi milljóna í Glitni banka á árunum fyrir hrun. Bréfin seldi hann með miklum hagnaði árið 2007, en fréttastofa Stöðvar 2 fjallaði um málið í kvöldfréttum.
Samkvæmt lögum ber dómurum að tilkynna nefnd um dómarastörf um öll viðskipti að virði meira en þriggja milljóna króna. Samkvæmt Stöð 2 seldi Markús hlutabréf fyrir 44 milljónir króna, en í kjölfarið fjárfesti hann í gegnum einkabankaþjónustu Íslandsbanka fyrir tæpar 60 milljónir króna.
Talið er að fleiri dómarar hafi átt í viðskiptum á þessum tíma og gætu þau mál komið upp á yfirborðið á næstunni. Markús hefur dæmt í málum sem tengjast hruninu, en í samtali við fréttastofu Stöðvar 2 telur hann sig ekki vanhæfan og segist jafnframt hafa tilkynnt um viðskiptin.
Einnig verður fjallað um málið í Kastljósi Ríkissjónvarpsins.
