Auka þarf sveigjanleika innan íslensks landbúnaðar auk þess að efla hvata til nýsköpunar og auka samkeppnisaðhald greinarinnar. Það verður best gert með breytingum á bæði tollvernd landbúnaðarvara og fyrirkomulagi styrkja til þeirra sem stunda rekstur í greininni.
Þetta kemur fram í niðurstöðum skoðunar Viðskiptaráðs Íslands sem birt er á vefsíðu ráðsins. Í skoðuninni kemur meðal annars fram að 40% matvælaútgjalda heimila megi rekja til vörutegunda þar sem tollvernd er við lýði. Lítill innflutningur sé á tollvernduðum matvælum, 3% af neyslu mjólkurvara og 5% af neyslu kjöts.
Þá kemur einnig fram að arðsemi íslenskra bændabýla sé neikvæð ef horft er framhjá opinberum styrkjum og framleiðni í mjólkurframleiðslu sé 20% undir meðaltali nágrannaríkja. Verð á tollvernduðum vörum er allt að 60% hærra en í nágrannaríkjunum.
Viðskiptaráð segir að afnám tolla myndi skila neytendum um tíu milljörðum króna árlega í formi lægra vöruverðs.
