Ef marka má hreyfingar á peningamörkuðum eru fjárfestar í Lundúnum að búast við því að Englandsbanki lækki vexti í ágústmánuði, samkvæmt viðskiptablaði The Guardian í morgun.
Ummæli Sir Dave Ramsden aðstoðarseðlabankastjóra Englandsbanka á föstudaginn eru sögð hafa haft áhrif á hreyfingar en hann sagði opinberlega að verðbólgan gæti hjaðnað hraðar á næstu árum en spár gera ráð fyrir.
Fjárfestar eru því nú að búast við því að bankinn lækki vexti úr 5,5% í 5% í ágúst fremur en í september. Þá standa vonir til að næsta vaxtalækkun verði í desembermánuði og að stýrivextir Bretlands myndi verða 4,75% um árslok.
Verðbólga í Bretlandi lækkaði minna en spár gerðu ráð fyrir í marsmánuði og mældist 3,2% á ársgrundvelli. Ramsden var gestur á opinberum viðburði í Washington D.C höfuðborg Bandaríkjanna á föstudaginn en hann sagði þar að vonir standi til að verðbólgan muni hjaðna mikið í aprílmánuði og verði nálægt 2% verðbólgumarkmiði bankans.