Glitnir gaf síðastliðinn föstudag út skuldabréf í Bandaríkjunum fyrir 500 milljónir Bandaríkjadali eða sem samsvarar 33,5 milljörðum íslenskra króna. Skuldabréfin eru á gjalddaga í janúar árið 2011 og eru kjör bréfanna eru 44 punktar yfir bandarískum millibankavöxtum (LIBOR) að því er segir í frétt félagsins.
Þetta er fyrsta skuldabréfaútgáfa Glitnis undir nýjum MTN rammasamningi bankans um skuldabréfaútgáfu í Bandaríkjunum (144A). JP Morgan Securities hafði umsjón með gerð rammasamningsins fyrir Glitni.
Þetta er fyrsta opinbera skuldabréfabréfaútgáfa bankans síðan í febrúar þar sem ekki er um að ræða víkjandi útgáfu. Á þessu ári hefur Glitnir gefið út tvær opinberar víkjandi útgáfur til styrkingar á eiginfjárstöðu bankans en meirihluti annarrar fjármögnunar hefur verið í formi einkaútgáfa. Í lok ágúst tilkynnti Glitnir að bankinn hefði tryggt endurfjármögnun fyrir árið 2007. Mikill áhugi hefur verið undanfarið meðal bandarískra fagfjárfesta á skuldabréfum bankans og mun útgáfan nú styðja við frekari vöxt bankans á næsta ári sem og að viðhalda sterkri lausafjárstöðu hans.
JP Morgan Securities, Merrill Lynch og Wachovia Capital Markets höfðu umsjón með útgáfunni.
