Þingmenn í fulltrúadeild Bandaríkjaþings hafa örfá daga til stefnu til að ná samkomulagi um áframhaldandi fjármögnun ríkissjóðs en ef það næst ekki mun ríkið neyðast til að stöðva starfsemi ríkisstofnana s.s. dómstóla o. fl. vegna fjárskorts.
Matsfyrirtækið Moody‘s greindi frá því í morgun að ef komi til þess er lánhæfismat Bandaríkjanna í hættu en Moodys er eina stóra matfyrirtækið sem metur lánshæfi ríkissjóðs sem AAA.
Matsfyrirtækið Fitch lækkaði lánshæfismat Bandaríkjanna í AA+ úr AAA í byrjun ágúst og fylgdi þannig í fótspor Standards & Poors sem lækkuðu lánshæfismat ríkisins úr AAA flokki í fyrsta skipti í sögunni árið 2011.
Þúsund milljarða vaxtakostnaður
Báðar ákvarðanir voru teknar í tengslum við deilur um hækkun skuldaþak ríkisins.
Það stefnir í að skuldir Bandaríkjanna nái 33 þúsund milljörðum dala og að ríkið muni greiða þúsund milljarða bandaríkjadala í vexti á árinu.
Repúblikanar og Demókratar eru nálægt því að ná samkomulagi um áframhaldandi fjármögnun ríkissjóðs í öldungadeildinni en Repúblikanar í fulltrúadeildinni vilja endurskoða hernaðar- og efnahagsstuðning við Úkraínu.
Knappur tími er til stefnu en lögin þurfa að vera samþykkt fyrir 1. október annars þarf öll ríkisstarfsemi að stöðvast vegna fjárskorts.
„Ef ríkisstarfsemi neyðist til að stöðvast mun það hafa slæm áhrif á lánhæfismat Bandaríkjanna,“ segir William Foster, greiningaraðili hjá Moody‘s í samtali við Reuters.
Foster segir að komi til þess muni það líklega leiða til þess að Moody‘s þurfi að lækka lánhæfismatið.
Greiningardeild Moody‘s telur þó að ef komi til þess að stöðva þurfi alla ríkisstarfsemi verður það einungis til skamms tíma og muni ekki hafa teljandi áhrif á skuldasöfnun ríkissjóðs.
