Laxey, sem byggir upp landeldi á laxi í Vestmannaeyjum, lauk í síðustu viku sex milljarða hlutafjáraukningu. Félagið lauk þar með fjármögnun á 4.500 tonna framleiðslu á laxi á landi, sem mun einnig innihalda seiðastöð og framleiðslu á stórseiðum.
Laxey hefur nú alls safnað meira en 12 milljörðum króna í hlutafé með fjármögnunarlotum.
Blue Future Holding, sem er hluti af þýsku fjölskyldusamsteypunni EW Group, var leiðandi fjárfestir í útboðinu.
Meðal annarra fjárfesta í útboðinu má nefna Nutreco, sem er stærsti framleiðandi á fiskifóðri í heimi, Seaborn, leiðandi söluaðila á laxi, Kjartan Ólafsson og öflugt hollenskt sjávarútvegsfyrirtæki.
Auk þeirra tók fjöldi öflugra fjárfesta einnig þátt en má þar nefna Almenna lífeyrissjóðinn, Festa lífeyrissjóður, Lífeyrissjóð Vestmannaeyja og Snæból. Hlutafjáraukningin kemur nánast eingöngu frá nýjum hluthöfum en um 25 nýir fjárfestar komu inn í félagið.
Samkvæmt fréttatilkynningu frá Laxey mun fulltrúi frá Blue Future Holding taka sæti í stjórn Laxey en Kjartan Ólafsson einnig tilnefndur.
„Viðskiptaáætlun gerir ráð fyrir sölu á stórseiðum og eldi á matfiski. Uppbygging verkefnisins er í fullum gangi og seiðastöðin er þegar komin í rekstur. Nú þegar hafa tveir hópar hrogna verið teknir inn í stöðina sem vaxa í samræmi við áætlanir. Seiðastöðin getur framleitt 4 milljónir seiða árlega og verður fullbúin haustið 2024. Framkvæmdir eru á áætlun fyrir áframeldið, sem mun nýta hagstæðar náttúrulegar aðstæður í Vestmannaeyjum,“ segir í fréttatilkynningu.
Félagið greinir einnig frá því að þar sem Laxey verður með umtalsverða umframframleiðslu á seiðum á fyrstu árum starfseminnar hefur félagið tekið þá ákvörðun að nýta sjótankana í áframeldinu fyrir framleiðslu stórseiða til sölu, samhliða framleiðslu á laxi til manneldis.
Sala á stórseiðum til hefðbundins eldisiðnaðar mun draga úr lúsavandamálum með því að stytta eldistímann í sjó.
Laxey hefur hingað til aðallega verið fjármagnað af fjölskyldu Sigurjóns Óskarssonar en félagið segir að með innkomu hinna öflugu fjárfesta, sem innihalda m. a. leiðandi fyrirtæki í alþjóðlegum laxeldisiðnaði, muni skapast mjög sterkur grundvöllur fyrir frekari vexti.
„Við erum himinlifandi með þann stuðning sem LAXEY hefur frá upphafi haft frá núverandi fjárfestum okkar, og nú hinn mikla áhuga sem við fengum frá nýjum fjárfestum. Það er til vitnis um að stefna okkar um að byggja sjálfbært og fjárhagslega hagkvæmt laxeldi í Vestmannaeyjum fellur vel að markmiðum fjárfesta“ segir Lárus Ásgeirsson, stjórnarformaður LAXEY.
„Þessi hlutafjáraukning og áframhaldandi þróun verkefnisins undirstrikar skuldbindingu okkar til sjálfbærs fiskeldis, uppbyggingu á nýjum iðnaði í Vestmannaeyjum og eflingu laxeldisiðnaðar á Íslandi.“
Norski fjárfestingabankinn Arctic Securities var umsjónaraðili hlutafjárútboðsins, en Mar Advisors voru fjármálaráðgjafar fyrir LAXEY
