Fasteignafélagið Reginn hf. hagnaðist um 750 milljónir á fyrsta ársfjórðungi þessa árs, en það er 31% aukning frá sama tíma í fyrra.
Í tilkynningu frá félaginu segir að rekstrartekjur félagsins hafi numið 1.530 milljónum og var vöxtur leigutekna 26% milli ára. Rekstrarhagnaður fyrir matsbreytingar og afskriftir nam 1.003 milljónum og jókst um 26% frá fyrsta ársfjórðungi í fyrra. Afkoman er í samræmi við áætlun félagsins.
Virði fjárfestingaeigna eykst
Bókfært virði fjárfestingareigna í lok tímabilsins var 76.378 milljónir samanborið við 63.949 milljónir í árslok 2015. Matsbreyting á tímabilinu var 517 milljónir. Vaxtaberandi skuldir félagsins hafa aukist um rúmlega 7 milljarða frá því í fyrra og námu í lok mars 46,6 milljörðum.
Stækkun eignasafns
Stærstu eignir Regins eru verslunarmiðstöðin Smáralind í Kópavogi og Egilshöll í Grafarvogi. Útleiguhlutfall á safni félagsins var 97%. Í tilkynningunni segir jafnframt að uppbygging og stækkun eignasafns félagsins hafi gengið í samræmi við áætlun og fjárfestingarstefnu þess. Félagið fékk á tímabilinu afhent fasteignafélögin Ósvör ehf. og CFV 1 ehf. Félögin eiga eignasöfn sem telja 23 fasteignir og um 43 þúsund fermetra, útleiguhlutfall safnsins er um 93%.
Félagið keypti einnig allt hlutafé í fasteignafélögunum Þrekhöllinni ehf. og Vatneyri ehf., en þau félög eiga fasteignirnar Strandgata 14 og Skólastígur 4. Félögin eru hluti af samstæðu Regins hf. frá og með 1. mars 2016