Borgarfulltrúar San Fransisco-borgar í Bandaríkjunum samþykktu í gær sölubann á rafrettum í borginni. BBC segir frá .
Bannið – sem nær til verslana og afhendingar netverslana í borginni – er sagt hafa verið lagt á þar til heilsufarsáhrif rafretta verði betur þekkt. Talsmenn bannsins segja seljendur markvisst reyna að höfða til ungs fólks með bragðbættum rafrettuvökva.
Andstæðingar bannsins segja það munu hrekja rafrettunotendur aftur til hefðbundinna sígaretta, sem séu enn skaðlegri, auk þess að búa til svartan markað.
Höfuðstöðvar Juul Labs – stærsta rafrettuframleiðanda Bandaríkjanna, með um 70% markaðshlutdeild – eru í San Fransisco.
Fyrirtækið segist nú þegar hafa gert meira en allir aðrir framleiðendur til að tryggja að vörur þess endi ekki í höndum neytenda undir lögaldri, og benda á að hinar nýju reglur muni á engan hátt hefta sölu hefðbundins tóbaks, sem dragi um 40 þúsund Kaliforníubúa til dauða árlega.
Reglurnar þurfa staðfestingu London Breed, borgarstjóra borgarinnar, innan 10 daga til að taka gildi, en talið er afar líklegt að hún fáist.
